ԵՐԵՎԱՆ, 29 հունվարի — Sputnik. Վիտալինա Ցիմբալյուկ-Ռոմանովսկայայի նախկին պաշտպան Էլինա Մազուրն ամեն կերպ փորձում է ապացուցել, որ հրաժարվել է մութ անցյալից և ջանք չի խնայում «լուսավոր ուժերի» կողմ անցնելու համար։ Այս մասին նա ասել է ՆՏՎ հեռուստաընկերության եթերում հեռարձակվող «Ռուսական նոր սենսացիաներ» հաղորդման ժամանակ։
Նա ապաշխարել է ու գնացել Արմեն Ջիգարխանյանի փաստաբան Եվգենի Պարֆյոնովի մոտ։ Փաստաբանը, զգուշանալով սադրանքներից, Մազուրին առանձնապես ջերմությամբ չի ընդունել։
«Ինձ համար այստեղ գալը հեշտ չէր, մենք երկար ժամանակ դիմակայել ենք։ Հնարավոր է`ծիծաղելի թվա, բայց ես երկար ժամանակ համարում էի, որ դուք ավազակ եք»,- հանդիպման ժամանակ ասել է Մազուրը։
Նա շեշտել է, որ Ջիգարխանյանի հանդեպ սխալ վերաբերմունք է ունեցել։
«Դուք հասկանու՞մ եք, որ այս ամենին խառնված է ոչ միայն Վիտալինան, այլև ազդեցիկ մարդիկ»,- հարցրել է Մազուրը։
Երկար զրույցից հետո Ջիգարխանյանի փաստաբանն ասել է, որ արդեն բավականաչափ ապացույցներ ունի Վիտալինային խարդախության մեղադրանք ներկայացնելու համար։
Մազուրը որոշել է նաև անձմամբ ներողություն խնդրել Ջիգարխանյանի նախկին կնոջից` Տատյանա Վլասովայից։ Նա քաղցրավենիք է վերցրել ու գնացել Վլասովայի տուն, սակայն վերջինս սառն է դիմավորել հյուրին։
«Ես մեղավոր եմ ձեր առաջ, բայց ուզում եմ շտկել այս սարսափելի իրավիճակը։ Ես շատ ուշ հասկացա ամեն ինչ»,- վստահեցրել է Մազուրը։
Վլասովան սառնասրտորեն լսել է Էլինային, հրաժարվել է ընդունել նրա բերած քաղցրավենիքը` նշելով, որ շաքարախտ ունի։
«Ես չեմ կարող ներել ո՛չ ձեզ, ո՛չ Վիտալինային, որովհետև մեր կյանքի վերջին տարիներն անդարձ փչացան ։ Եվ որևէ քաղցրավենիքով ու բանջարեղենով այդ ամենը հետ չես բերի»,- ասել է Վլասովան։
Կանայք մի հարցում համակարծիք են եղել` Վիտալինան վտանգավոր մարդ է։ Վլասովան ասել է, որ նույնիսկ վախենում է դերասանի կյանքի համար։
«Ես վախենում եմ նրանց հանդիպումից (Վիտալինայի ու Ջիգարխանյանի)… Գուցե նա հատուկ ունակություններ ունի՞։ Չեմ ասում, որ նա կկրակի Ջիգարխանյանի վրա, ինչպես Կապլանը` Լենինի։ Թեև հիվանդից ամեն ինչ կարելի է սպասել»,-ասել է Վլասովան։
Մի քանի ամիս շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։ Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։ Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։ Նշենք, որ նոյեմբերի 27-ին Մոսկվայի Կունցևոյի 202-րդ շրջանի դատական տեղամասը բավարարել է դերասան և ռեժիսոր Արմեն Ջիգարխանյանի ու Վիտալինա Ցիմբալյուկ-Ռոմանովսկայայի ամուսնալուծության դիմումը։
