ԵՐԵՎԱՆ, 27 հունվարի — Sputnik. Սուրբ Սարգսի օրը վերջին տարիներին Հայաստանում ամենասիրելի տոներից է դարձել։ Այն մեծ շուքով են նշում, երիտասարդները ուրախանում են, օրհնություն են ստանում ու, եթե բախտները բերի` նախատոնական գիշերը երազում իրենց ապագա ամուսնուն կամ կնոջն են տեսնում։
Ի՞նչն է Սուրբ Սարգիսի տոնն առանձնահատուկ դարձնում։
Գուշակություններ
Մի գեղեցիկ ավանդույթ կա։ Այդ օրը պատրաստում են հալվա, խաշիլ, փոխինձ, աղանձ։
Պատրաստած ուտեստները սկուտեղի կամ ափսեի մեջ պետք է թողնել տան տանիքի կամ պատուհանագոգի վրա։ Եթե առավոտյան ուտեստի մեջ ոտնահետքեր տեսնեք, ապա դրանք թողել է Սուրբ Սարգսի ձին, որ հրեշտակների հետ անցել է ձեր տան մոտով։ Իսկ դա նշանակում է, որ այս տարի ձեր բախտը կբերի` դուք կգտնեք ձեր 2–րդ կեսին ու կամուսնանաք։
Միաժամանակ պետք է նշել, որ Հայ առաքելական եկեղեցին սիրահարներին կոչ է անում չվերածել գեղեցիկ ավանդույթը գուշակության, այլ հետևել օրվա պատգամին։
Աղի բլիթ կամ նախագուշակ երազ
Սուրբ Սարգսին նախորդող գիշերը երիտասարդներն աղի բլիթ են ուտում։ Դրանից հետո հարկավոր է ոչ մի բան չուտել ու չխմել։ Ըստ ավանդության` երազում կարող է հայտնվել ապագա ամուսինը կամ կինը և մի բաժակ ջրով հագեցնել ծարավ երիտասարդի սիրտը։
Եթե սիրելի մարդը ձեզ երազում ջուր բերի, ապա դա նշան է ի վերուստ` դուք, անպայման, միասին կլինեք։
Տոնակատարություն
Այս տարի սիրահարների տոնը նշվում է հունվարի 27–ին։ Առավոտյան Սուրբ Սարգիս եկեղեցիներում պատարագ է մատուցվում։ Այս տարի պատարագից հետո Արարատյան Հայրապետական թեմը պարգևատրել է 22 զինծառայողի։ Ժամը 14:00–ին կսկսի խաչերով երթը` Մաշտոցի պողոտայից, Բաղրամյանի պողոտայով մինչև Սիրահարների այգի, որտեղ մեծ տոնական համերգ տեղի կունենա։ Շքերթը գլխավորում է դիմակավորված Սուրբ Սարգիսը։
Նշենք, որ Հայաստանում Սուրբ Սարգիսի օրը ազգային այլընտրանք է երիտասարդների կողմից սիրված օտարածին (կաթոլիկ) Սուրբ Վալենտինի օրվան։
Երիտասարդների օրհնություն
Սուրբ պատարագից հետո եկեղեցիներում երիտասարդներին օրհնելու արարողություն է անցկացվում։
Գոյություն ունեն նաև այլ ժողովրդական ավանդույթներ։ Սուրբ Զորավար Սարգիսը բոլոր սիրահարների օգնականն է համարվում, նա հրաշքներ է գործում ինչպես սիրահարների, այնպես էլ միայնակ սրտերի համար։
Այդ օրը երիտասարդները աղոթում են ու խնդրում սրբին իրենց աղոթքները Աստծուն հասցնել։ Ընդունված է համարել, որ սուրբը լսում է աղջիկների ու տղաների խնդրանքը։
Ուրախություն ու նվերներ
Վերջին տարիներին տարբեր հաստատություններ երիտասարդների համար հետաքրքիր միջոցառումներ են կազմակերպում` հայկական ազգային տոնը նշելու համար։
Այդ օրը սիրահարները միմյանց բացիկներ, ծաղիկներ ու քաղցրավենիք են նվիրում։
