ԵՐԵՎԱՆ, 26 հունվարի — Sputnik. Մեծ տարածում ունեցող ստամբուլյան Show Radyo ռադիոկայանին տուգանել են Ալիևների ընտանիքի` Ադրբեջանի նախագահի ու փոխնախագահի հասցեին վիրավորական արտահայտությունների համար։ Այս մասին հայտնում է թուրքական Diken պարբերականը։
Թուրքիայի հեռուստառադիոընկերության բարձրագույն խորհուրդը (RTÜK) պատժամիջոցներ է կիրառել թուրքական Show Radyo ռադիոկայանի նկատմամբ՝ 2018 թվականի հունվարի 16–ին եթեր գնացած հաղորդման ժամանակ Ադրբեջանի նախագահ Իլհամ Ալիևին ու նրա կնոջը՝ Մեհրիբան Ալիևային վիրավորելու համար։
RTÜK–ը սպառնացել է` մեկ տարվա ընթացքում նմանատիպ ևս մի հաղորդում հեռարձակելու դեպքում ռադիոկայանը 10 օր ժամկետով կզրկվի հեռարձակման իրավունքից: Եթե ռադիոկայանը որոշի ևս մեկ անգամ կրկնել դա եթերում` ապա ռադիոկայանի արտոնագիրը չեղարկվի։
RTÜK–ի այս որոշումը Թուրքիայի ռադիոհեռարձակման պատմության մեջ ամենախիստ որոշումն է։
Հաղորդավարի հեգնական մեկնաբանությունը վերաբերում էր Մեհրիբան Ալիևանյին` Ադրբեջանի առաջին փոխնախագահի պաշտոնում նշանակմանը։
