ԵՐԵՎԱՆ, 26 հունվարի — Sputnik. Հայաստանում անչափահասների հանցագործությունների մակարդակը մի փոքր նվազել է։ Հայաստանի ոստիկանության գնդապետ Նելլի Դուրյանն այսօր հրավիրված ասուլիսի ժամանակ որոշ տվյալներ ներկայացրեց։
Նրա խոսքով` 2016 թվականի 351 դեպքի համեմատ Հայաստանում 2017 թվականին իրավապահ մարմիններն անչափահասների մասնակցությամբ 341 հանցագործության դեպք են գրանցել։ Հանցագործությունների կառուցվածքը ևս փոխվել է. կրճատվել է ծանր հանցագործությունների թիվը։
«2016 թվականին գրանցվել է անչափահասների իրականացրած սպանության 5 դեպք, իսկ 2017 թվականին` ոչ մի։ 2016 թվականին անզգույշ սպանության 1 դեպք է իրականացվել, իսկ 2017 թվականին` զրո», — նշեց Դուրյանը։
Նրա խոսքով` կրճատվել է այն հանցագործությունների թիվը, որոնք կապված են ծանր մարմնական վնասվածքներ հասցնելու հետ. 12 և 10 դեպք` համապատասխանաբար 2016 և 2017 թվականներին։
Ոստիկանության տվյալներով` 2017 թվականին անչափահասների մասնակցությամբ կողոպուտի 5 դեպք է գրանցվել` 2016 թվականի 7-ի դիմաց։ Անցյալ տարի դեռահասների մասնակցությամբ խարդախության 3 դեպք է բացահայտվել (մեկ դեպքով պակաս)։
Բանախոսը հայտնեց, որ անցյալ տարի աճել են խուլիգանության դեպքերը. 2016 թվականի մեկ դեպքի դիմաց գրանցվել է 4 դեպք։
Դուրյանի խոսքով, կրճատվել է նաև իրավախախտումներ կատարած աղջիկների թվաքանակը։ 2016 թվականին նրանց թիվը 34 է եղել, 2017-ին` 28։
2017 թվականի հունվարից դեկտեմբեր ժամանակահատվածում կրճատվել է երեխաների նկատմամբ իրականացված հանցագործությունների թիվը. գրանցված է 190 դեպք (2016-ի 197-ի դիմաց), որոնցից 13-ը` ընտանեկան բռնության դեպք (տարվա ընթացքում ցուցանիշը չի փոխվել)։ Սեռական բռնության են ենթարկվել 71 անչափահաս (2016 թվականին գրանցվել է 80 դեպք)։
Գնդապետ Դուրյանն ընդգծեց, որ անչափահասների հանցագործությունները կանխելու նպատակով տարվա ընթացքում երեխաների հետ տարբեր մասնագետներ են աշխատում` սկսած դպրոցական տեսուչներից մինչև հոգեբաններ։ Գործընթացում ներգրավված են պետական տարբեր կառույցներ` Կրթության և գիտության նախարարությունը, Երևանի քաղաքապետարանը և այլն, ինչպես նաև մասնավոր կազմակերպություններ։
Այնուամենայնիվ, մասնագետները նշում են, որ երեխայի դաստիարակության հիմնական պատասխանատուներն ընտանիքի անդամներն են. եթե երեխան օրենք է խախտում կամ փողոցում է հայտնվում, միայն ծնողներն են մեղավոր։ Պատճառը ընտանիքում առկա բացասական մթնոլորտն է, ծնողների անգրագիտությունը, աղքատությունն ու ընտանիքի ինստիտուտի կազմալուծումը։ Այս ոլորտներում իրավիճակի բարելավումը միակ միջոցն է անչափահասների հանցագործությունների մակարդակն էապես նվազեցնելու համար, համոզված են փորձագետները։
