ԵՐԵՎԱՆ, 25 հունվարի — Sputnik. Հենրիխը պատրաստ է «Արսենալում» հաջողության հասնել, իսկ «մանչեսթերյան անեծքը» պետք է անցյալում մնա։ Հինգշաբթի տեղի ունեցած մամուլի ասուլիսի ժամանակ ասել է «Արսենալի» և Ֆրանսիայի հավաքականի լեգենդար հարձակվող Թիերի Անրին, հայտնում է բրիտանական Express.co.uk պարբերականը։
Անրին Հենրիխ Մխիթարյանի տաղանդի մեծ երկրպագուն է։
«Ինչ վերաբերում է Մխիթարյան-Սանչես գործարքին, կարող եմ ասել, որ դեռևս Դորտմունդի «Բորուսիայի» տարիներից ես Միկիի մեծ երկրպագուն եմ եղել։ Սակայն ՄՅ-ում ինչ-որ բան այնպես չգնաց», — ասել է լեգենդար ֆուտբոլիստը։
Անրին ավելացրել է, որ Մխիթարյանն իր ոճով «Արսենալի» խաղացող է և լիովին համահունչ է թիմի խաղին։
Ավելի վաղ հարցազրույցներից մեկում Մխիթարյանը խոստովանել էր, որ լինելով «Արսենալի» երկրպագու` սիրահարված է Թիերի Անրիի խաղին։
Հենրիխ Մխիթարյանի տեղափոխությունը չիլիացի կիսապաշտպան Ալեքսիս Սանչեսի` «Մանչեսթեր Յունայթեդ» տեղափոխվելու գործարքի մի մասն էր դարձել։
Մխիթարյանը «Արսենալի» կազմում հանդես է գալու 7 համար ներքո և շաբաթական 180-200 հազար ֆունտ ստեռլինգ է ստանալու։
