ԵՐԵՎԱՆ, 24 հունվարի — Sputnik. Նախագահ Սերժ Սարգսյանն այսօր Ստրասբուրգում մասնակցել է Եվրոպայի խորհրդի խորհրդարանական վեհաժողովի ձմեռային նստաշրջանի լիագումար նիստին, որտեղ հանդես է եկել ելույթով և պատասխանել պատգամավորներին հետաքրքրող հարցերին:
Պատասխանելով հայ-թուրքական հարաբերությունների մասին հարցին ՀՀ նախագահը նշել է, որ մեր ժողովրդի համար վիրավորական կլինի, Թուրքիայի հետ հարաբերություններ հաստատելու համար գնալ միակողմանի զիջումների։
«Մենք լավ չենք հասկանում թուրքական կողմի պահանջը: 2008-ին իմ ընտրվելուց հետո ես նախաձեռնեցի հայ-թուրքական հարաբերությունների հրապարակայնացումը, արդյունքում հանդիպում տեղի ունեցավ Հայաստանի ու Թուրքիայի նախագահների միջև և 2009-ին Շվեյցարիայի Ցյուրիխ քաղաքում ՄԱԿ-ի անվտանգության խորհրդի մշտական անդամ երկրների ԱԳ նախարարների ներկայությամբ կողմերը ստորագրեցին երկու փաստաթուղթ երկրների միջև հարաբերություններ սկսելու մասին»,-ասաց ՀՀ նախագահը:
Սակայն ստորագրումից հետո ամեն ինչ չէ, որ հարթ ու պայմանավորվածությունների համաձայն է ընթացել։
«Փաստաթղթերում էլ հստակ նշված էր, որ հարաբերություններ պետք է հաստատվեն առանց նախապայմանների, բայց մինչև օրս էլ թուրքական կողմը շարունակում է նախապայամններ առաջադրել: Միջազգային պրակտիկայում մենք նման նախադեպի չենք հանդիպել, բոլոր հարցերը բանակցվում են մինչև փաստաթուղթ ստորագրել: Ինը տարի շարունակ մենք լսում ենք թուրքական կողմից ինչ-որ քայլ ձեռնարկելու մասին: Մինչդեռ փաստաթղթում նշվում է, նախ հաստատել հարաբերություններ, ապա անդրադառնալ երկու երկրների միջև եղած կնճռոտ հարցերին»,-հիշեցրել է Սերժ Սարգսյանն:
ՀՀ նախագահը նշել է, որ Հայաստանը երբեք որևէ նախապայման չի կարող ընդունել: Թեպետ Թուրքիան հզոր պետություն է, հզոր պոտենցիալ ունի, բայց դա չի նշանակում, որ նա կարող է խոսել ուժի դիրքերից կամ նախապայմանների լեզվով:
«Մեր ժողովրդի համար վիրավորական կլինի, հարաբերություններ հաստատելու համար գնալ միակողմանի զիջումների։ Մինչև գարուն հայ-թուրքական արձանագրություններն առոչինչ են ճանաչվելու, եթե Թուրքիան չհրաժարվի որդեգրած քաղաքականությունից»,-ասաց երկրի ղեկավարը:
«Շատ ցանկալի և ճիշտ կլինի, որ Թուրքիան փխրուն տարածաշրջանում կայունությունը պահպանելու համար հրաժարվի նման դիրքորոշումից ու Ադրբեջանին սատարելու քաղաքականությունից: Ուզում եմ հիշեցնել, որ 2016-ի ապրիլին միակ երկիրն էր, որ հրապարակավ սատարում էր Ադրբեջանի ռազմական գործողությունները»,-ասաց Սերժ Սարգսյանը:
