ԵՐԵՎԱՆ, 23 հունվարի — Sputnik. Մենք առավել քան շահագրգռված ենք ընդլայնելու ֆրանսիական գործարար ներկայությունը մեր երկրում, ասել է ՀՀ նախագահ Սերժ Սարգսյանը Ֆրանսիայի նախագահ Էմանուել Մակրոնի հետ հանդիպումից հետո։
Նա նշել է, որ Մակրոնի հավանությունն է ստացել Ֆրանկոֆոնիայի շրջանակում անցկացնելու ֆրանկոֆոն գործարարների համաժողով, որը, իհարկե, նոր թափ կհաղորդի հայ-ֆրանսիական տնտեսական հարաբերություններին:
Սարգսյանը գործընկերոջ հետ պայմանավորվել է ուշադրության կենտրոնում պահել երկկողմ տնտեսական կապերը։
Եվրոպական գործընկերների, այդ թվում՝ ԵՄ-ի աջակցությամբ Հայաստանում շարունակվող ժողովրդավարական բարեփոխումները, տնտեսությունն ու օրենսդրությունը եվրոպական չափանիշներին մոտարկելու մեր հանձնառությունը տարեցտարի առավել բարենպաստ միջավայր են ապահովում Հայաստանում ներդրումների համար։
«Այս առումով նախագահ Մակրոնին վերահաստատեցի, որ մենք առավել քան շահագրգռված ենք ընդլայնելու ֆրանսիական արդեն իսկ պատկառելի գործարար ներկայությունը մեր երկրում»,- ասել է ՀՀ նախագահը։
Նրանք անդրադարձել են նաև ղարաբաղյան հակամարտության թեմային։
«Խոսեցինք Լեռնային Ղարաբաղի հակամարտության մասին, որը, թերևս, մեր տարածաշրջանի ամենազգայուն հարցերից է։ Բարձր գնահատեցի Ֆրանսիայի, որպես ԵԱՀԿ Մինսկի խմբի համանախագահ երկրի, մոտեցումներն ու երկարամյա ջանքերը՝ ուղղված հիմնախնդրի խաղաղ հանգուցալուծմանը և մեր տարածաշրջանում անվտանգության, կայունության ու համագործակցության հաստատմանը: Հայաստանը հանձնառու է շարունակելու համանախագահների միջնորդությամբ բանակցությունները: Հայտնի է, որ Լեռնային Ղարաբաղի ժողովուրդը պայքարում է ազատության, ինքնորոշման համար, և այսպիսի պայքարը չի կարող բարեհաջող ավարտ չունենալ»,- ասել է Սարգսյանը։
Նախագահ Սերժ Սարգսյանը Ֆրանսիա է մեկնել աշխատանքային այցով։
