ԵՐԵՎԱՆ, 23 հունվարի — Sputnik. Ֆրանսիայի նախագահ Էմանուել Մակրոնը հայտնել է Twitter-ի իր էջում` ինչի համար է մասնակցելու Հայաստանում կայանալիք Ֆրանկոֆոնիայի գագաթնաժողովին։
«Ես ներկա եմ լինելու 2018 թվականի հոկտեմբերին Երևանում կայանալիք Ֆրանկոֆոնիայի գագաթնաժողովին, որպեսզի մեր ֆրանսալեզու քաղաքականությանը նոր խթան տամ», —գրել է Մակրոնը Twitter-ում։
Մեկնաբանություններում օգտատերերից մեկը հարցրել է Մակրոնին. «Փոքրիկ ուղերձ Էրդողանի՞ն, որպեսզի Թուրքիան վերջապես ճանաչի Հայոց ցեղասպանությունը»։
Je serai présent au sommet de la Francophonie à Erevan en octobre 2018 pour donner une nouvelle impulsion à notre politique francophone. pic.twitter.com/q6p2ohpZdZ
— Emmanuel Macron (@EmmanuelMacron) 23 января 2018 г.
Մակրոնն այս գրառումը հրապարակել է Փարիզում աշխատանքային այցով գտնվող ՀՀ նախագահ Սերժ Սարգսյանի հետ հանդիպումից հետո։
Նախագահ Սերժ Սարգսյանը հունվարի 22-ին և 23-ին հանդիպումներ է ունեցել Ֆրանսիայի նախագահ Էմանուել Մակրոնի, Սենատի նախագահ Ժերար Լարշեի, Ազգային ժողովի նախագահ Ֆրանսուա դը Ռյուժիի, ինչպես նաև Ֆրանսիա-Հայաստան բարեկամության պատգամավորական խմբի անդամների հետ:
Ֆրանկոֆոնիայի գագաթնաժողովը` ֆրանկոֆոն երկրների բարձրաստիճան պատվիրակությունների մասնակցությամբ, տեղի կունենա Երևանում 2018 թվականին։
ՀՀ նախագահ Սերժ Սարգսյանի գնահատմամբ` գագաթնաժողովն անկախ Հայաստանի պատմության մեջ ամենախոշոր միջոցառումն է լինելու։
