ԵՐԵՎԱՆ, 23 հունվարի — Sputnik. 2018 թվականին Հայաստանի պետբյուջեից հատուկ պահպանվող տարածքների սպասարկման համար 858 մլն դրամ է հատկացվել, իսկ Կովկասի բնության հիմնադրամը և մի քանի այլ կազմակերպություններ միասին տրամադրել են 931 մլն դրամ արդիական խնդիրները լուծելու համար։ Այդ մասին երեքշաբթի լրագրողներին հայտնեց ՀՀ բնապահպանության նախարարության կենսառեսուրսների կառավարման գործակալության բնության հատուկ պահպանվող տարածքների և դենդրոպարկերի կառավարման բաժնի պետ Արամ Աղասյանը։
Նրա խոսքով` վերջին տարիների ընթացքում Հայաստանում հատուկ պահպանվող տարածքներն ավելացել են։
«2009 թվականից հետո երկու նոր ազգային պարկեր են ստեղծվել` «Արևիկ» և «Արփի լիճ», ինչպես նաև բավական խոշոր արգելոցներ Խուստուփում և Զանգեզուրում։ Մենք պայմանավորվածություններ ունենք արտասահմանյան մի շարք կազմակերպությունների հետ, որոնք կօգնեն մեզ ստեղծել «Տաթև», «Ջերմուկ» ազգային պարկերն ու «Իջևան» արգելոցը», — նշեց Աղասյանը։
Սակայն, նրա խոսքով, մի շարք խնդիրներ կան, որոնք վերաբերում են Հայաստանի բնության պահպանությանը։ Օրինակ` պետք է արմատապես վերանայել կադրային վարչարարության հարցը։
Աղասյանի խոսքով` այս ամենը կօգնի բարձրացնել բնության պահպանության խնդիրներով զբաղվող մասնագետների պատրաստվածության մակարդակը։
«Մենք արդեն տեխնիկական վերահսկման ժամանակակից միջոցներ ենք տեղադրել` շուրջօրյա դիտարկման տեսախցիկներ, ֆոտոխցիկներ և այլն։ Սակայն մենք շատ բարդ ռելիեֆներ ու լանդշաֆտներ ունենք, սա ձեզ համար ռուսական հարթավայրերը չէ։ Նման տեղանքում շատ դժվար է տեսանկարահանող սարքեր տեղադրել ու այլ աշխատանքներ իրականացնել», — ընդգծեց չինովնիկը։
Նա նշեց, որ միայն Խոսրովի արգելոցում լիարժեք մոնիտորինգ իրականացնելու համար պետք է տեսանկարահանող 1000 սարքեր տեղադրել։
WWF վայրի բնության հիմնադրամի հայկական մասնաճյուղի տնօրեն Կարեն Մանվելյանն իր հերթին նշեց, որ դիտարկման նոր համակարգերը կօգնեն նաև բացահայտել որսագողության դեպքերը։
«Ավելին` արգելոցների ղեկավարությունը կկարողանա հետևել անվտանգության աշխատակիցների և այլ աշխատողների գործունեությանը», — ընդգծեց Մանվելյանը։
Նրա խոսքով` նման հնարավորություններ կան, օրինակ, եղջերուների բազմացմամբ զբաղվող դիլիջանյան կենտրոնում։
Աղասյանը նշեց, որ Վայրի բնության համաշխարհային հիմնադրամի (WWF) հայաստանյան մասնաճյուղի տվյալներով, Հայաստանում աճել է վայրի խոզերի, գայլերի, բեզոարյան այծերի և ասիական մուֆլոնների պոպուլյացիան։
Հայաստանում կա 27 արգելավայր, ինչպես նաև` 232 հաստատված բնության հուշարձան։ Դրանցից ներկա պահին հաստատված անձնագիր ունեն 31-ը։
