ԵՐԵՎԱՆ, 23 հունվարի — Sputnik. Այսօր «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով խորհրդարանական լսումներին զեկույցով հանդես եկավ Կենտրոնական բանկի նախագահ Արթուր Ջավադյանը:
«2017 թվականը բնութագրվում է ցածր գնաճային միջավայրով, որը ԿԲ-ն իր քաղաքականությամբ աստիճանաբար մոտեցնում է նպատակայինի: ԿԲ-ն շարունակել է նվազեցնել վերաֆինանսավորման տոկոսադրույքը՝ մեղմելով գնանկումային միջավայրը»,-ասաց Ջավադյանը և նշեց, որ տարեկան գնաճի կանխատեսմամբ՝ գնաճը գտնվել է 2,5%-ի շուրջ:
«Հետագա կանխատեսումներն արդեն ներառել են օրենսդրական փոփոխություններ, որոնք վերաբերում են ակցիզային հարկի դրույքաչափին և ԵԱՏՄ անդամ երկրների համար սահմանված դրույքաչափերի ազդեցությանը: Այդ փոփոխությունների ազդեցության մասին ԿԲ-ն հայտարարել է, որ տարեկան գնաճը գրեթե համընկել է կանխատեսումներին և դարձել է 2,6%, որը թույլատրելի սահմանի ամենաստորին հատվածն է»,-ասաց նա և ներկայացրեց հարևան երկրների ցուցանիշները։
Վրաստանում 2017թ. գնաճը կազմել է 6,7%, Ադրբեջանում՝ 7,9%, ՌԴ-ում՝ 2,5%, Ուկրաինայում՝ 19, 9%, Իրանում՝ 10%:
ԿԲ նախագահը շեշտեց, որ երկու տարի շարունակ գնաճի սպասումները նվազել են, ինչը կարևոր է տնտեսության զարգացման համար՝ ֆինանսական հատվածի, դրամի նկատմամբ վստահությունն է էապես բարձրացել:
«Սակայն ներկայում, պայմանավորված ակցիզային հարկի և մաքսատուրքերի դրույքաչափերի փոփոխությամբ, նաև մի քանի ապրանքատեսակների գների աճով, ավելացել են գնաճի սպասումները, որոնք ուժգնանում են որոշ փորձագետների, գործիչների մամուլում պարբերաբար շրջանառվող չհիմնավորվող սպեկուլյատիվ շահարկումներով: Մենք այդ սպասումները համարում ենք գերագնահատված, դա էր նաև հիմնավորումներից մեկը, որ չնայած գնաճի սպասումների ավելացմանը, ԿԲ-ն դեկտեմբերի վերջին անփոփոխ թողեց վերաֆինանսավորման տոկոսադրույքները»,-ասաց նա:
Ըստ Արթուր Ջավադյանի` ԿԲ-ն իրականացնում է գնաճի տասնօրյա օպերատիվ դիտարկումներ։ Վերջին դիտարկումը, որն ընդգրկում է դեկտեմբերի 20-ից հունվարի 20-ն ընկած ժամանակահատվածը, չնայած դիզվառելիքի, սեղմված գազի ու բենզինի գնաճին, 2018-ի հունվարին գնաճը կլինի նախորդ տարիներին արձանագրվածի շրջանակներում:
ԿԲ նախագահի խոսքով՝ կանխատեսվում է, որ 2018-ին գնաճը աստիճանաբար կմոտենա 4% նպատակային ցուցանիշին և կկայունանա դրա շուրջ: Ջավադյանը կարծիքով` սպառողական զամբյուղը ներկայացնում է առավելապես ցածր եկամուտ ունեցող խավի սպառման կառուցվածքը, և առանձին ապրանքատեսակների բարձրացման չափը կրկին գերագնահատված է:
