ԵՐԵՎԱՆ, 23 հունվարի — Sputnik. «Ենի Ադրբեջան» («Նոր Ադրբեջան») իշխող կուսակցության ներկայացուցիչ, ռուս-ադրբեջանական միջխորհրդարանական կապերի աշխատանքային խմբի անդամ Այդին Միրզազադեն հայտնել է, որ Մոսկվայում տեղադրված աղբամանները, որոնք ներկված են իրենց ազգային դրոշի գույներով, Ադրբեջանի ժողովրդին ուղղված վիրավորանք է։
«Մեզ մտահոգում է, որ աղբամանները Ադրբեջանի ազգային դրոշի գույներով են ներկված։ Կարծում եմ`Ռուսաստանը շուտով կլուծի այդ հարցը»,- Միրզազադեի ասածը մեջբերում են ադրբեջանական լրատվամիջոցները։
Մեկնաբանելով մոսկովյան առևտրի կենտրոններից մեկում տեղադրված աղբամանների գույները` նա նշել է, որ այդ քայլն իրականացրել են Ադրբեջանին չսիրող ուժերը։
«Նրանք շատ լավ գիտակցում են, որ զայրույթ կառաջացնեն։ Գիտեն նաև, որ դա չի կարող երկար տևել ու վերացվելու է։ Ադրբեջանի` պետականություն կառուցելու և միջազգային խաղաղության հարցում գրանցած հաջողություններն անհանգստացնում են այն ուժերին, որոնց չեն ուզում դա»,- ասել է նա։
Միրզազադեն նկատել է, որ նման սադրանքները չեն կարող ազդել ադրբեջանա-ռուսական հարաբերությունների վրա։
«Սադրիչների նպատակն է Ռուսաստանի նկատմամբ դժգոհություն սերմանել։ Հնարավոր է` պատճառն այն է, որ երկիրը նոր զենք է գնել Ռուսաստանից։ Հայերի սփյուռքն այդպիսով փորձում է փչացնել երկրների բարեկամական հարաբերությունները», — ասել է Միրզազադեն։
Նա հույս է հայտնել, որ այդ հարցը կհայտնվի Ռուսաստանում Ադրբեջանի դեսպանատան ու սփյուռքի կազմակերպությունների ուշադրության կենտրոնում, և մեղավորները կպատժվեն։
«Եթե խնդրի լուծումը ձգձգվի, մենք պաշտոնապես կդիմենք», — նշել է պատգամավորը։
Սոցիալական ցանցերի օգտատերերից մեկը հրապարակել է ադրբեջանական դրոշի գույներով ներկված աղբամանների լուսանկարը։ Աղբամանի վրա գրված է. «Գույնը նշանակություն ունի»։
Նշենք, որ եվրոպական երկրներում թափոններն առանձին հավաքելու համակարգ է գործում, ըստ որի` տարբեր գույների տարաները օգտագործվում են տարբեր տեսակի աղբի համար։ Դա արվում է բնապահպանական նկատառումներից ելնելով. տեսակավորված աղբը կարելի է վերամշակել։
