ԵՐԵՎԱՆ, 22 հունվարի — Sputnik. Փարիզում Երևանի «Թումո» դպրոցի նման ստեղծարար տեխնոլոգիաների կենտրոն է բացվելու։ Այդ մասին Twitter–ի իր պաշտոնական էջում ՀՀ նախագահ Սերժ Սարգսյանի ու հայ համայնքի ներկայացուցիչների հետ հանդիպումից հետո հունվարի 22-ին գրել է Փարիզի քաղաքապետ Ան Իդալգոն։
Հայաստանին ու Ֆրանսիային կապում են ընդհանուր անցյալն ու ընդհանուր արժեքները։ Այսօր երկրները միասին ապագա են կառուցում, որը հիմնված է նույն արժեքների վրա, նշել է Ան Իդալգոն` ընդգծելով, որ բարի կամքի և ապագայի ձգտման խորհրդանիշ է Փարիզում հայկական դպրոցի նման նոր դպրոցի բացումը։ Ֆրանսիացի մասնագետները Փարիզի քաղաքապետի գլխավորությամբ «Թումո» էին այցելել 2016 թվականի հոկտեմբերին։
#Paris et l'#Arménie ont un passé et des valeurs en commun. Aujourd'hui nous construisons un futur partagé, bâti autour de ces mêmes valeurs. 🇦🇲 pic.twitter.com/ccy9JgXdzX
— Anne Hidalgo (@Anne_Hidalgo) 22 января 2018 г.
Նշենք, որ Սերժ Սարգսյանը աշխատանքային այցով մեկնել է Փարիզ։
Հանրապետության նախագահն այցի շրջանակում հունվարի 22-ին և 23-ին հանդիպումներ կունենա Ֆրանսիայի նախագահ Էմանուել Մակրոնի, Սենատի նախագահ Ժերար Լարշեի, Ազգային ժողովի նախագահ Ֆրանսուա դը Ռյուժիի, ինչպես նաև Ֆրանսիա-Հայաստան բարեկամության պատգամավորական խմբի անդամների հետ։ Հայաստանի և Ֆրանսիայի նախագահները հանդիպման արդյունքները կամփոփեն համատեղ մամուլի ասուլիսում:
Հունվարի 24-ին Ստրասբուրգում Հայաստանի նախագահը կմասնակցի Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանին, որտեղ հանդես կգա ելույթով և կպատասխանի պատգամավորներին հետաքրքրող հարցերին: Սերժ Սարգսյանը հանդիպումներ կունենա նաև Եվրոպայի խորհրդի գլխավոր քարտուղար Թորբյորն Յագլանդի, Մարդու իրավունքների եվրոպական դատարանի (ՄԻԵԴ) նախագահ Գիդո Ռայմոնդիի, «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) նախագահ Ջաննի Բուքիքիոյի և ԵԽԽՎ նորընտիր նախագահի հետ:
