ԵՐԵՎԱՆ, 19 հունվարի — Sputnik. 2018 թվականից մարդատար ավտոմեքենաներն արտերկրից (այդ թվում` Եվրասիական միությունից) Հայաստանի տարածք կկարողանան մուտք գործել առանց ճանապարհային հարկ վճարելու։ Այդ հնարավորությունն ընձեռում է Հարկային նոր օրենսգիրքը, որն ուժի մեջ է մտել 2018 թվականի հունվարի 1-ից։
Ավելի վաղ արտերկրում գրանցված մարդատար ավտոմեքենաների վարորդները պետք է 10 հազարական դրամ վճարեին Հայաստանում անցկացրած յուրաքանչյուր 15 օրվա համար։ Այժմ նրանք Հայաստանի տարածքում կարող են երթևեկել անվճար։
Հարկերը կպահպանվեն միայն բեռնատարների վարորդների համար։ Իսկ մարդատար ավտոմեքենաներն ամբողջությամբ ազատվել են այդ վճարներից։
Իսկ ռուսաստանցիները 2017 թվականից Հայաստան կարող են գալ նաև առանց արտասահմանյան անձնագրերի։ Այսպիսով, ուղևորության համար լրացուցիչ փաստաթղթերի և ավելորդ գումարների կարիք չի լինի։
