ԵՐԵՎԱՆ, 19 հունվարի — Sputnik. Բանտային ղեկավարությունը պարտավոր է հավասար պայմաններ ապահովել բոլոր բանտարկյալների համար, հեղինակությունների հեշտ ու հանգիստ կյանքին պետք է վերջ տալ։ Այս մասին հունվարի 19-ին կայացած ասուլիսի ժամանակ ասաց ՀՀ արդարադատության նախարարության ՔԿՀ-ներում հասարակական վերահսկողություն իրականացնող հասարակական դիտորդների խմբի անդամ Ռոբերտ Ռևազյանը։
Ոչ մեկի համար գաղտնիք չէ, որ անհավասարություն կա ոչ միայն ազատության մեջ, այլ նաև բանտում. 8-հոգանոց խցում մինչև 15 բանտարկյալ են պահում, մյուսներում բնակվում է 4-5 մարդ։ Այդ «էլիտար» բանտախցերում բանտարկյալներն իրենց միջոցներով փոխում են պատուհանները, վերանորոգում պատերը։
«Այնտեղ ապրում են ունևոր ընտանիքների զավակներն ու հեղինակությունները»,- նշեց նա։
Բանտի ղեկավարությունը բավականին հանդուրժող է քրեական հիերարխիայի հարցում։ Ըստ Ռևազյանի` նրանց համար այդպես ավելի հեշտ է վերահսկել բանտարկյալներին։
Այդ դրվածքը հասկանալի պատճառներով ձեռնտու է հեղինակություններին. դա ոչ միայն հարմարավետություն է տեղում, այլ նաև բանտ վերադառնալու գայթակղություն, որտեղ նրանց կարգավիճակն ավելի բարձր է, քան ազատության մեջ, որտեղ նրանք չեն կարող աշխատանքի տեղավորվել, իսկ բանտում նրանք հրամայում են մյուսներին։
«Եթե նրանք իմանան, որ բանտում ոչ մի առավելություն չունեն և մնալու են մյուսների նման, շատ չեն ձգտի վերադառնալ բանտ», — ասաց Ռևազյանը։
Նա նշեց, որ նախարարությունը պետք է մշակի գործողությունների ծրագիր` «պետություն պետության մեջ» գաղափարն արմատախիլ անելու համար։
