ԵՐԵՎԱՆ, 18 հունվարի — Sputnik. Հայաստանի մարզերում տրանսպորտային առաջին ցանցի ստեղծման համար նախատեսված պայմանները կհայտարարեն մինչև 2018 թվականի մարտի վերջ։ Այս մասին լրագրողներին հայտնեց տրանսպորտի, կապի և ՏՏ նախարար Վահան Մարտիրոսյանը։
Մրցույթը հայտարարվելու է Արմավիրի մարզի համար և այն միջազգային է լինելու. մասնակցել կարող են նաև արտասահմանյան ընկերությունները։ Իշխանությունները կտեսնեն, թե ինչպես են ավտոբուսներն այստեղ «գալիս», հետո կորոշեն, թե ինչպես միացնեն ամբողջ հանրապետության երթուղային ցանցերը։
Մրցութային պահանջներն առայժմ պարզ չեն։ Ի՞նչ վառելիքով են աշխատելու ավտոբուսները` դիզելով, թե՞ գազով (որն ավելի էժան է)։ Հնարավոր կլինի՞ բարձրացնել ուղևորավարձը։ Օրական քանի՞ անգամ պետք է երթուղի դուրս գան ավտոբուսներն ու երթուղայինները, հատկապես հեռավոր գյուղերում։
Այս հարցերի պատասխանները տրանսպորտի նախարարությունը կներկայացնի կառավարությանը։ Եվս մի քանի ամիս կարող է պահանջվել մրցույթն անցկացնելու համար։
Ամբողջ մարզը մեկ օպերատորի հանձնելու որոշումը կայացվել է` հիմնվելով նախորդ փորձի վրա։ Այժմ օպերատորները իրար մեջ կիսում են «յուղոտ» երթուղիները (Երևանի և նախկին շրջկենտրոնների միջև), իսկ գյուղի երթուղիները լրացվում են մնացորդային սկզբունքով։ Այդ պատճառով հանրապետության 200 գյուղում մինչև այսօր էլ ո՛չ ավտոբուս կա, ո՛չ երթուղային տաքսի։
