ԵՐԵՎԱՆ, 18 հունվարի — Sputnik. Եվրոպայի խորհրդին կից Հայաստանի մշտական ներկայացուցիչ, դեսպան Պարույր Հովհաննիսյանը ստորագրել է Եվրոպայի խորհրդի կոնվենցիան կանանց նկատմամբ բռնության և ընտանեկան բռնության դեմ պայքարի մասին, այսօր հաղորդել է Հայաստանի ԱԳՆ մամուլի քարտուղար Տիգրան Բալայանը։
«Հայաստանն աջակցում է Եվրոպայի խորհրդի ռազմավարությանը ընտանիքում բռնությունն արմատախիլ անելու հարցում», – գրել է Բալայանը Twitter-ի իր էջում։
"#Armenia supports the Council of Europe strategy to eliminate domestic violence": Ambassador #Hovhannisyan signed the @CoE Convention on preventing & combating violence against women & domestic violence pic.twitter.com/KJc3o6Glo3
— Armenia in CoE 🇦🇲 (@armrepcoe) 18 января 2018 г.
Նա հաղորդել է, որ ստորագրման արարողությունը տեղի է ունեցել Ստրասբուրգում։ Ավելի վաղ` 2017թ–ի դեկտեմբերի 28–ին, փաստաթուղթը հավանության էր արժանացել Հայաստանի կառավարության նիստում։
2011թ–ի մայիսի 11–ին ընդունված կոնվենցիան դարձել է առաջին եվրոպական համաձայնագիրը` ուղղված կանանց նկատմամբ բռնության և ընտանեկան բռնության դեմ։ Այդ համաձայնագիրը վավերացրած երկրները պարտավոր են պաշտպանել և աջակցել բռնության նման տեսակներից տուժածներին։ Նրանք պետք է ստեղծեն թեժ գծեր, ապաստաններ, ցուցաբերեն բժշկական, հոգեբանական և իրավական օգնություն։
