ԵՐԵՎԱՆ, 17 հունվարի — Sputnik. Նեֆտեկամսկի հայերը հարձակվել են պատգամավոր Իլդուս Շամսիյարովի վրա։ «Մեդիակորսետին» այս մասին հայտնել է հենց ժողովրդի ընտրյալը։
Այժմ նա բազմաթիվ վնասվածքներով և ուղեղի ցնցումով գտնվում է հիվանդանոցում։ Տուժողը պատմել է, որ հունվարի 13-ին իր վրա են հարձակվել 10 մարդ։
«Նրանք հայեր էին, մենք գնացել էինք նրանց գրասենյակ` մեր տրակտորը վնասելու հարցը լուծելու։ Հենց ներս մտանք, իմ գլխին ատրճանակ պահեցին, իսկ մեխանիկին, որն ինձ հետ էր, հարվածեցին հրացանի կոթով», — պատմել է Շամսիյարովը։
Վիճաբանությունը ծագել է այն պատճառով, որ ճանապարհային շինարարության օբյեկտում աշխատող բեռնատարը վնասել է վարձակալած տրակտորը, բայց չնայած վնասին, որը նախնական գնահատվել է 100 հազար ռուբլի, ճանապարհային ոստիկանության աշխատողներին չեն կանչել։
«Մենք փորձեցինք տեղում խոսել, նրանք առաջարկեցին հանդիպել գրասենյակում։ 10 հոգով էին։ Իմ ձեռքին կրակեցին, հետո սկսեցին ծեծել, լավ է, որ ատրճանակը տրավմատիկ էր», — ասել է պատգամավորը։
Շամսիյարովին շտապօգնության մեքենայով տեղափոխել են հիվանդանոց։ Պատգամավորի խոսքով` բժիշկները եկել են ոստիկանությունից հետո։
Հարձակման պահից մի քանի օր է անցել, այդ ընթացքում ոստիկանության աշխատակիցները չեն դիմել պատգամավորին։ Բաշկիրիայի ՆԳՆ-ից չի հաջողվել մեկնաբանություն ստանալ, գերատեսչությունում առաջարկել են պաշտոնական հարցում ուղարկել։
Իլդուս Շամսիյարովը ճանաչում է ձեռք բերել, երբ Կրասնոկամսկի շրջանի պատգամավորների խորհրդի նիստերից մեկի ժամանակ խորհուրդը բնութագրել է որպես «կոռուպցիոն ճահիճ»։
