ԵՐԵՎԱՆ, 17 հունվարի — Sputnik. Վրաստանում սեղմված գազը մինչև հիմա ավելի թանկ է, քան Հայաստանում։ Այս մասին ԱԺ-ում հարցուպատասխանի ժամանակ հայտարարեց Հայաստանի վարչապետ Կարեն Կարապետյանը` պատասխանելով «Ծառուկյան» դաշինքի պատգամավոր Շաքե Իսայանի հարցին։
Հայաստանի լցակայաններում գազն ավելի էժան է (մեկ խորանարդ մետրի համար 220 դրամ), այն դեպքում, որ Հայաստանը վճարում է Ռուսաստանին դրա տարանցման համար։ Իսկ այնտեղ գազը, եթե դրամի վերածենք, արժե 260-310 դրամ։
«Գազը թանկացել է մեկ խորանարդ մետրի համար 190 դրամից մինչև 220 դրամ, վերադարձել է 2015թ-ի գնին։ Իհարկե, լավ կլիներ, եթե գինը նույնը մնար, բայց դա նորություն չէ։ Մենք այդ գնով էլ ապրել ենք և նվազեցրել այն, երբ հնարավորություն է եղել», — ասաց Կարապետյանը։
Հիշեցնենք, որ 2018թ-ից Հայաստանում սեղմված գազի ակցիզը մեկ խորանարդ մետրի համար 8,33 դրամից դարձել է 25 դրամ։
