Պատմամշակութային արժեքներն ընդհանրապես օտարման ենթակա չեն։ Sputnik Արմենիայի հետ զրույցում, մեկնաբանելով գանձապետարանում պահվող արժեքների վաճառքի մասին ՀՀ կառավարության ընդունած որոշումը, ասել է ՀՀ Ֆինանսների նախարարի տեղակալ Արմեն Հայրապետյանը։
«Իրացվելի են համարվում թանկարժեք մետաղները, քարերը։ Որպեսզի մենք կարողանանք արտակարգ իրավիճակներից ապահովել մեր երկիրը, պետք է ունենանք այնպիսի պահուստներ, որոնք իրացվելի են»,- ասաց նա։
Փոխնախարարը հիշեցրեց, որ ժամանակին փորձ արվեց վաճառել մարգարիտները, որոնք ժամանակի ընթացքում կորցնում են իրենց արժեքը, բայց չկարողացավ շուկայական գնով վաճառել դրանք. գնորդ չգտնվեց։ Հայրապետյանի խոսքով` եթե դրանք իրացնելու խիստ անհրաժեշտություն առաջանար, պետությունը ստիպված էր լինելու անհամեմատ ավելի ցածր գնով վաճառել։
«Մենք փորձելու ենք այն բոլոր արժեքները` քարերը, մետաղները, որոնք ոչ իրացվելի են, փոխել ավելի որակյալներով»,- ասաց փոխնախարարը։
Արմեն Հայրապետյանի տեղեկացմամբ, Պետական գանձարանում այսօր 400 մլն դրամի իրացվելի ակտիվ կա, որոնք հիմնականում ոսկու ձուլակտորներ են, և 1.5 մլրդ դրամի իրացվելի միջոցներ` իրեր, որոնք ժամանակի ընթացքում կորցնում են իրենց արժեքը։
