ԵՐԵՎԱՆ, 17 հունվարի — Sputnik. Փետրվարին Բուլղարիան մտադիր է Հայաստանի հետ աշխատանքային միգրացիան կարգավորող համաձայնագիր կնքել։ Այս մասին հայտնում է economy.bg կայքը` հղում անելով Բուլղարիայի աշխատանքի ու սոցիալական քաղաքականության նախարար Բիսեր Պետկովին։
Բուլղարացի պաշտոնյայի խոսքով` աշխատանքային միգրացիայի ոլորտում հայ-բուլղարական համագործակցությունը հիմնվելու է երկկողմանի համաձայնագրերի վրա, նախաձեռնության հեղինակը բուլղարական կողմնն է։
«Փորձագետները մշակում են համաձայնագրերի տեքստերը», — ասել է նախարարը։
Պետկովի խոսքով` բուլղարական կողմը նման համաձայնագրերի կնքման մասին բանակցություններ է վարում Ուկրաինայի ու Մոլդովայի հետ։
Նշենք, որ Բուլղարիայի կառավարությունը դեռ 2017 թվականին հավանություն էր տվել աշխատանքային միգրացիան կարգավորող համաձայնագրի նախագծին։ Փաստաթուղթը հիմք է դարձել հայկական, մոլդովական ու ուկրաինական կողմերի հետ բանակցությունների համար։
