ԵՐԵՎԱՆ, 16 հունվարի — Sputnik. «Դեպի Եվրատեսիլ» նախագծի YouTube-յան պաշտոնական ալիքում հրապարակվել են հետևյալ հինգ երգերը, որոնք կպայքարեն «Եվրատեսիլ 2018» մրցույթում Հայաստանը ներկայացնելու իրավունքի համար։
Kamil Show — Puerto Rico
Իսպաներեն երգը հույզերի ու սեփական բացառիկությունը ճանաչելու խիզախության մասին է։ Kamil Show կերպարի տակ թաքնված է հայտնի հեռուստահաղորդավար և հումորիստ Արսեն Գրիգորյանը։ Աշխույժ հիթի երաժշտությունը գրել է Վահրամ Պետրոսյանը, իսկ խոսքը` Արթուր Աբգարը։
Sevak Khanagyan — Qami
Հայերեն գրված քնարական բալլադը քամին ու հուշերը ցրելու կարողության մասին է, երգում է հայ, ռուս և ուկրաինացի հանդիսատեսի սիրելի Սևակ Խանաղյանը։ Երգի երաժշտությունը գրել է կատարողը, իսկ խոսքը` Աննա Դանիելյանն ու Վիկտորյա Մալոյանը։
Սևակը հայտնի դարձավ ռուսական «Ձայնը» նախագծին մասնակցելուց հետո, որտեղ երաժիշտը հիասքանչ կատարեց «Կուկուշկա» երգը։ Իսկ 2016 թվականին արտիստը գերեց «Х-ֆակտոր» նախագծի (ուկրաինական հեռուստանախագիծ) հանդիսատեսին։
Tyom — Follow The Ocean
«Հետևի՛ր օվկիանոսին» աշխույժ երգը կատարում է Տյոմը, որը հայ հանդիսատեսի սիրուն արժանացավ, երբ «Х-ֆակտոր» նախագծի նկարահանումների ժամանակ խոստովանեց, որ իրեն քասթինգի է ուղարկել տատիկը։ Մրցույթին ներկայացվող երգի բառերը գրել է Իննա Մկրտչյանը, երաժշտությունը` Գևորգ Գևորգյանը։
Angel — Heartbeat
Հայ «հրեշտակի» (թարգմանաբար հենց այսպես է հնչում Անժելա Բարսեղյանի մականունը) «սրտի» բաբախը մրցույթի պարային գլխավոր հիթը դառնալու բոլոր հնարավորություններն ունի։ Երաժշտության հեղինակը հենց երգչուհին է, իսկ խոսքերն օգնել է գրել Վահրամ Յանիկյանը։
AlternatiV — Stare At Me
AlternatiV երիտասարդների խմբի երգը պատմում է աղջկա և տղայի մասին, որոնք համակրում են միմյանց, նայում են իրար, բայց ամաչում են մոտենալ։ Երաժշտության և խոսքի հեղինակը Սարգիս Բուռնազյանն է։
Մասնակիցների մրցութային երգերը Youtube-ի ալիքում կհրապարակվեն մինչև հունվարի 18-ը ներառյալ։
«Դեպի Եվրատեսիլ» նախագծի նոր եթերաշրջանը բաղկացած կլինի 3 փուլից՝ նախընտրական, կիսաեզրափակիչ և եզրափակիչ, որոնք Առաջին ալիքի եթերում կհեռարձակվեն 2018թ.-ի փետրվարի 3-ից։ Մրցույթի հաղթողին կորոշեն հեռուստադիտողները և միջազգային փորձագետներից կազմված ժյուրին՝ ձայների 50/50 հարաբերակցությամբ։
Հիշեցնենք, որ 63-րդ «Եվրատեսիլ» երգի միջազգային մրցույթը կանցկացվի Պորտուգալիայի մայրաքաղաք Լիսաբոնում ՝ մայիսի 8-ին, 10-ին և 12-ին։ Մրցույթին կմասնակցի 43 երկրի ներկայացուցիչ։
