ԵՐԵՎԱՆ, 16 հունվարի — Sputnik. Մոտ 40 մարդ (սիրիացի ուսանող և ՀԿ–ների ներկայացուցիչներ) այսօր հավաքվել էին Հայաստանում Ռուսաստանի դեսպանատան առջև։ Անկախ ձնախառն եղանակից, նրանցից յուրաքանչյուրը` Ռուսաստանի և Հայաստանի դրոշներով, «Շնորհակալություն, Ռուսաստան» պաստառներով, եկել էր երախտագիտություն հայտնելու Ռուսաստանին՝ Սիրիայի ազատագրման գործում ցուցաբերած օժանդակության և Սիրիայի ժողովրդին աջակցելու համար:
«Մենք, Սիրիայի ուսանողների և հասարակական կազմակերպությունների ներկայացուցիչների անունից, հավաքվել ենք շնորհակալական նամակ փոխանցելու` մեր հայրենակիցներին աջակցելու համար », – Sputnik Արմենիայի թղթակցի հետ զրույցում ասաց Հայաստանում Սիրիայի ուսանողական միության նախագահ Ջուլյա Փամփալյանը։
Ջուլյան Հայաստան էր եկել 2012 թվականին, Սիրիայում մարտական գործողությունների թեժ պահին։ Աղջիկը ծննդավայրում թողել է հարազատներին ու մտերիմներին։ Նա Հալեպից մի կերպ կարողացել է հասնել Լիբանան, այնուհետև նաև Երևան։ Հայաստանում նոր կյանք ու նոր պայքար սկսվեց։
«Ինձ օգնեցին, շարունակեցի ուսումս, փառք աստծո, այսօր ամեն ինչ լավ է։ Դեռ չգիտեմ, կվերադառնամ Սիրիա, թե ոչ, ամեն ինչ կախված է հանգամանքներից», – ասաց Ջուլյան։
Բոլոր այդ մարդկանց մի պատմություն է միավորում. նրանք ուզում էին փրկվել պատերազմի վայրագություններից ու խաղաղ երկինք տեսնել։
Նասրի Նասրին ևս ուսանում է Հայաստանի բուհերից մեկում։ Նա կարոտում է հայրենի տունն ու հույս ունի, որ ուսումն ավարտելուց հետո կվերադառնա Սիրիա։
Սիրիայի ուսանողների ակցիային աջակցություն էր հայտնել նաև Միջազգային հումանիտար զարգացման ՀԿ-ն:
«Ռուսաստանն ու ռուս ժողովուրդը բազում տարիների ընթացքում բարեկամական Սիրիայի կողքին են եղել։ Աջակցել են Սիրիայի ժողովրդին։ Այսօր վեց ՀԿ–ների անունից մեր երախտիքն ենք հայտնում գրված նամակի տեսքով», – ասաց Միջազգային հումանիտար զարգացման ՀԿ-ի փոխնախագահ Ծովինար Կոստանյանը։
Հայաստանում Ռուսաստանի դեսպանատան աշխատակիցները իրենց երախտագիտությունը ևս հայտնեցին «շնորհակալություն» ասելով ակցիայի մասնակիցներին։ Հայաստանում Ռուսաստանի դեսպանատան խորհրդական Ալեքսանդր Վասիլևի խոսքով` շատ կարևոր է, որ կա հանրության աջակցությունը, հատկապես, կայունացման այս դժվարին ժամանակահատվածում։
«Ռուսաստանը շարունակելու է Սիրիայում իրավիճակի կայունացմանն ուղղված իր հետևողական քաղաքականությունը` շեշտը դնելով մարդասիրական կողմի վրա, քանի որ երկիրը վերականգնել է պետք», – ասաց Վասիլևը։
Նա համոզված է, որ այսօր ամենակարևորը միասնական Սիրիայի վերածնունդն է։
2016 թվականից ի վեր Հայաստանը նույնպես մարդասիրական օգնություն է տրամադրում Սիրիայի ժողովրդին։ Մոտ 40 տոննա ընդհանուր ծավալով (ներառյալ` պարենամթերք ու առաջին անհրաժեշտության իրեր) հումանիտար օգնության հերթական խմբաքանակը Հայաստանից Սիրիա է ուղարկվել 2017 թվականի փետրվարին։
2016 թվականի աշնանը ՀՀ նախագահ Սերժ Սարգսյանը հանձնարարականով երկու ինքնաթիռ Հայաստանից Սիրիա հասցրեցին 40 տոննա ծավալով հումանիտար օգնության առաջին խմբաքանակը։
