Լիլիթ Հարությունյան, Sputnik
Այսօր Ռուսաստանում գործունեության ծավալած գործարարներից ոմանք գլխավորում են ռուսական Forbes-ի ցուցակը։ Անհավանական բարձունքների հասնելով բիզնեսում` նրանցից շատերը զբաղվում են նաև բարեգործությամբ։ Հաճախ բարեգործական գործունեությունը չի սահմանափակվում մի երկրի սահմաններով, բայց Հայաստանը հատուկ տեղ է զբաղեցնում։ Հայրենիքում իրագործելով խոշոր նախագծեր` ռուսահայ գործարարներից շատերը մեծ աջակցություն են ցուցաբերում Հայաստանի տնտեսությանը։
Ռուբեն Վարդանյան
Հայտնի գործարար, բանկիր և բարեգործ, «Վարդանյան, Բրոյթման և գործընկերներ» ներդրումային ընկերության նախագահ, RVVZ Foundation ընտանեկան հիմնադրամի ստեղծող, Սկոլկովոյի մոսկովյան կառավարման դպրոցի հիմնադիր գործընկերը «Տրոյկա Դիալոգ» ներդրումային ընկերության հսկող բաժնետեր։ Նա եղել է նաև Sberbank CIB-ի համաղեկավարը, իսկ հետո` Սբերբանկի կառավարման նախագահի խորհրդատուն։
Գործարարը IDeA բարեգործական հիմնադրամի համահիմնադիրն է։ Հիմնադրամի գործունեությունն ուղղված է Հայաստանի երկարաժամկետ նախագծերի աջակցությանը։ Հայրենիքում Վարդանյանը լայնորեն հայտնի է դարձել 2008թ-ին «Տաթևի վերածնունդ» նախագծի շնորհիվ։ Հենց այդ նախագծի շրջանում էլ իրականացվել է «ՏաԹևեր» ճոպանուղու շինարարությունը։
Ռուբեն Վարդանյանը «100 կյանք» նախագծի նախաձեռնողներից է, որի շրջանակում հրապարակվում են Հայոց ցեղասպանության ժամանակ փրկվածների և նրանց փրկած մարդկանց պատմությունները։ Նա նաև «Ավրորա» ամենամյա մարդասիրական մրցանակի հիմնադիրներից է։ «Ավրորան» նպատակ ունի ութ տարի շարունակ (2015-2023թթ.՝ ի հիշատակ ութ տարի տևած Հայոց ցեղասպանության՝1915-1923թթ.) աջակցել մարդկանց, որոնք վտանգելով իրենց կյանքը` կնպաստեն այնպիսի նախագծերի իրագործմանը, որոնք կբարելավեն առավել կարիքավոր եւ աղքատ մարդկանց կյանքը
UWC Dilijan College-ը Հայաստանում միջազգային դպրոց է, որը մտնում է United World Colleges ցանցի մեջ։ Այն նույնպես հիմնվել է Ռուբեն Վարդանյանի նախաձեռնությամբ, որը նախագծում ներդրել է 115 միլիոն դոլար։ Քոլեջի ներդրողների շարքում կան նաև այլ հայ բարերարներ։
Բացի այդ, գործարարը զգալի ավանդ է ունեցել Վրաստանում ՀԱԵ թեմի Սուրբ Գևորգ տաճարի վերանորոգման գործում։ 3,5 միլիոն դոլար արժողությամբ նախագիծը ֆինանսավորել են Վարդանյանը, Սերգեյ Սարգիսովը, Ալբերտ Ավդոլյանը, Դանիիլ Խաչատուրովը և ուրիշներ։
Սամվել Կարապետյան
Գործարար և մեկենաս, «Տաշիր» ընկերությունների խմբի նախագահ և հիմնադիր («Տաշիրի» կազմում մտնում են ավելի քան 200 ընկերություն Ռուսաստանի տնտեսության տարբեր ոլորտներում)։ «Տաշիր» բարեգործական հիմնադրամի նախագահ։
Սամվել Կարապետյանի նախաձեռնությամբ ստեղծվել է «Հայաստանի ներդրողների ակումբ» հիմնադրամը։ Անցած տարվա նոյեմբերին հայտարարվել է, որ «Տաշիր» ընկերությունների խումբը «Հայաստանի ներդրողների ակումբ» հիմնադրամի և գործընկերների հետ առաջիկա տարիներին նախատեսում է ավելի քան 1,1 միլիարդ դոլարի ներդրումներ իրականացնել Հայաստանի տնտեսական տարբեր նախագծերում։ Հիմնական ուշադրությունը կհատկացվի էներգետիկայի ոլորտին։
2013թ-ին «Տաշիր» բարեգործական հիմնադրամը գործարկել է Էջմիածնի վանքում Ամենայն հայոց կաթողիկոս Գարեգին Բ-ի նստավայրի կապիտալ վերանորոգման ծրագիրը։ Երկու տարի անց հիմնադրամը ստանձնել է Աբխազիայի Գագրա քաղաքում ՀԱԵ Ամենափրկիչ վանական համալիրի շինարարությունն ավարտելու պարտավորությունը։
Արթուր Ջանիբեկյան
«Գազպրոմ մեդիա ժամանցային հեռուստատեսություն» սուբհոլդինգի ղեկավար և «ՏՆՏ-Տելեսետ» ԲԸ-ի գլխավոր տնօրեն, Comedy Club Production-ի հիմնադիր։
Ջանիբեկյանն առաջին նորարարական հայկական կրթական կենտրոնի` «Այբ կրթական հանգույցի» հիմնադիրներից և հովանավորներից է։ Նրա ջանքերով իրականացվել է Վարդենիս գյուղի (Արագածոտնի մարզ) կիսաքանդ բազիլիկ եկեղեցու վերակառուցումը։ Եկեղեցուց ոչ հեռու մատուռ է կառուցվել։
Գործարարը Երևանում տեղադրված երկու քանդակների գաղափարի հեղինակն է և հովանավորը` Դավիթ Երևանցու «Հավերժության բնակիչները» (գովաբանում է երկու հայ կանանց կերպարը, որոնք Հայոց ցեղասպանության տարիներին փրկել են «Մշո ճառընտիրը») և Դավիթ Մինասյանի «Տղամարդիկ», որը ստեղծվել է հայտնի ռեժիսոր Էդմոն Քեոսայանի համանուն ֆիլմի մոտիվներով։
Բացի այդ, հենց Ջանիբեկյանին է պատկանում «Մշակութային վերածնունդ» հիմնադրամի ստեղծման գաղափարը, որը զբաղվում է հայկական ժողովրդական երաժշտական ստեղծագործությունների վերածնունդով։ Հիմնադրամի աջակցությամբ իրականացվել են թվային երաժշտական գրադարանի ստեղծման ն և ձայնագրման, հայկական ազգային ժողովրդական և հոգևոր երաժշտության համաշխարհային պորտալի` www.armenianmusic.am-ի գործարկման աննախադեպ աշխատանքները։ Կայքում կա թվային ձայնագրությունների պահեստարան, ներառյալ` հայկական ժողովրդական երգեր, հայկական միջնադարյան երաժշտության նմուշներ, գործիքային կատարումներ, ինչպես նաև աշուղական երգեր (շուրջ 600 երգ)։
Վլադիմիր Ավետիսյան
«Ռոսնանո» ԲԲԸ-ի կառավարման փոխնախագահ, գործարար, մեկենաս, երաժիշտ։ Վլադիմիր Ավետիսյանը Դիլիջանի միջազգային դպրոցի (UWC Dilijan Сollege) հիմնադիրներից է։ Այսօր նա ներդրումներ է անում տարբեր նախագծերում, որոնք կապված են Հայաստանում վերականգնվող էներգետիկայի զարգացման հետ։
Անցած տարվա աշնանը Վլադիմիր Ավետիսյանը և նրա ստեղծած D'Black Blues Orchestra-ն փառահեղ բլյուզ համերգ են ներկայացրել Երևանի Հանրապետության հրապարակում` ի պատիվ Առաջին հանրապետության 99-ամյակի։
Դավիթ Յան
Գործարար, ABBYY ընկերությունների խմբի հիմնադիր և տնօրենների խորհրդի անդամ։ 2001թ-ի գիտության և տեխնիկայի ոլորտում Ռուսաստանի Դաշնության կառավարության մրցանակի դափնեկիր։
Դավիթ Յանը Հայաստանում «Այբ» դպրոցի և կրթական հիմնադրամի հիմնադիրներից է։ Գործարարը մասնակցել է նաև ԹՈՒՄՈ ստեղծարար տեխնոլոգիաների կենտրոնի ստեղծմանը, որը 2016թ-ին հայտնվել է աշխարհի նորարարական դպրոցների վարկանիշի առաջին հորիզոնականում։ Վարկանիշը կազմել է ֆրանսիական «We demain» ամսագիրը։
