ԵՐԵՎԱՆ, 15 հունվարի — Sputnik. Լոնդոնում մահացել է The Cranberries լեգենդար ռոք խմբի մենակատար, Zombie և Linger մեգահիթերի կատարող Դոլորես Օ'Ռիորդանը։ Մահվան մանրամասները հայտնի չեն, հաղորդում է The Sun-ը։
Տեղեկությունը հաստատել է երգչուհու կենսագիրը։
«Ընտանիքի անդամները շփոթված են և խնդրում են իրենց չանհանգստացնել այս դժվար պահին», — ասել է նա։
Reuters գործակալության տվյալների համաձայն` Օ'Ռիորդանը մահացել է նոր ստեղծագործության ձայնագրման ժամանակ։
Դոլորես Օ'Ռիորդանը ծնվել է 1971 թվականին Իռլանդիայի Լիմերիկ քաղաքում։ 1990 թվականին նա հաղթել է Cranberries-ի վոկալիստը դառնալու մրցույթում։ Դոլորեսը խմբի հետ հինգ ալբոմ է ձայնագրել, այդ թվում` Zombie և Linger հիթերը։
Երգչուհին վերջին տարիներին համագործակցում էր Cranberries-ի հետ, որը վերամիավորվել էր երկար տարիների դադարից հետո։ Խումբը շրջագայություն էր կազմակերպել Եվրոպայում, սակայն երաժիշտները ստիպված եղան համերգները դադարեցնել մեներգչուհու հիվանդության պատճառով։
2014 թվականին Օ'Ռիորդանը բաժանվեց Duran Duran խմբի նախկին մենեջեր Դոն Բերտոնից, որի հետ ապրել էին 20 տարի և համատեղ 3 երեխա ունեին։
