ԵՐԵՎԱՆ, 15 հունվարի — Sputnik. Եթե իշխանությունները բարձրացնում են ակցիզը, թող ադեկվատ նվազեցնեն աշխատավարձերի հարկերը։ Այդ մասին երկուշաբթի լրագրողներին ասաց ՀՀ ԱԺ փոխխոսնակ, «Ծառուկյան» դաշինքի պատգամավոր Միքայել Մելքումյանը։
2018թ–ի հունվարից սեղմված գազի ակցիզի աճի հետևանքով երկրի բյուջե 10 միլիարդ դրամով ավելի շատ ֆինանս կմտնի։ Գազի թանկացման պատճառով կարող են թանկանալ գրեթե բոլոր ապրանքները (քանի որ դրանք պետք է հասցնել մինչև խանութ)։ Բենզինի ակցիզից կշահեն ևս 3 միլիարդ, իսկ սիգարետից` շուրջ 5 միլիարդ։
Իսկ ահա եկամտահարկը չունևորների համար նվազեցրել են 1-2 հազար դրամով, ինչը բացարձակ համադրելի չէ։
Երկրում շուրջ 220 հազար մարդ կստանա նվազագույն աշխատավարձ (70 հազարից ավելի, հարկերը հանած` 55 հազար)։ Շուրջ 150 հազար մարդ ապրում է 100-120 հազար համեստ աշխատավարձով։ Այդ գումարով նրանք ստիպված են պահել ոչ միայն իրենց, այլ նաև ընտանիքը։
Այսինքն` նույնիսկ աշխատող քաղաքացիների շարքում Հայաստանում մարդկանց կեսից ավելին աղքատ է։ Այս պարագայում հարկերը բարձրացնելն անթույլատրելի է, նշեց նա։
«Եթ ակցիզն աճում է, թող ադեկվատ նվազեցնեն եկամտահարկը, որպեսզի մարդիկ կարողանան գնել թանկացող ապրանքները», – հայտարարեց Մելքումյանը։
Ուստի նրանք, ովքեր ամսական ստանում են մինչև 150 հազար դրամ, պետք է վճարեն ոչ թե 23 տոկոս, այլ 21 տոկոս, իսկ 150-300 հազար դրամի դեպքում` ոչ թե 28 տոկոս, այլ 26 տոկոս։ Այդ ժամանակ ապրանքների զամբյուղը և ծառայությունները գոնե նույնը կմնան, նշեց պատգամավորը։
