ԵՐԵՎԱՆ, 12 Հունվար — Sputnik. Մարդու իրավունքների պաշտպանի որոշմամբ ստեղծված աշխատանքային խումբը հացադուլ հայտարարած Արմեն Բիլյանին և Սմբատ Բարսեղյանին տեսակցելու նպատակով չհայտարարված այցով գտնվում է «Նուբարաշեն» քրեակատարողական հիմնարկում։ Այս մասին հայտնում է ՄԻՊ մամուլի ծառայությունը։
Այցի ընթացքում խմբի անդամներն առանձնազրույցներ են ունենալու «Սասնա ծռեր» խմբի հացադուլ հայտարարած անդամների հետ, ուսումնասիրելու են նրանց բժշկական փաստաթղթերը։
«Արայիկ Խանդոյանի, Արմեն Բիլյանի և Սմբատ Բարսեղյանի առողջական վիճակի հարցը Մարդու իրավունքների պաշտպանի աշխատակազմի ուշադրության կենտրոնում է»,- նշված է հայտարարության մեջ։։
Մարդու իրավունքների պաշտպանն արդեն մի քանի անգամ բանավոր և գրավոր ընթացակարգով բարձրացրել է Արմեն Բիլյանի և Սմբատ Բարսեղյանի պահանջների հարցը։
Նշենք, որ Արմեն Բիլյանը 24 օր առաջ է հացադուլ հայտարարել, Սմբատ Բարսեղյանը` 22 օր առաջ։ Որոշ տեղեկություններով` նրանք պահվում են 6 հոգանոց խցում, որտեղ 13 կալանավոր կա։
Հացադուլավորներն ու նրանց համակիրները ՔԿՀ վարչության ղեկավարներից պահանջում են պատշաճ պայմաններ ապահովել խմբի անդամների համար և «Նուբարաշենից» տեղափոխել «Արմավիր» ՔԿՀ։
Հիշեցնենք, որ 2016թ-ի հուլիսի 17-ին վաղ առավոտյան «Սասնա ծռեր» խմբի անդամները բեռնատար ավտոմեքենայով ջարդել էին ոստիկանական ՊՊԾ գնդի մուտքի դարպասները, ներս մտել գնդի տարածք ու գրավել այն։
Խումբը պահանջում էր Սերժ Սարգսյանի հրաժարականն ու քաղբանտարկյալների ազատ արձակումը։ 14 օր տևած պաշարումից և մարդկային մի քանի կորուստներից հետո խմբի անդամները վայր դրեցին զենքերն ու հանձնվեցին իրավապահներին։
