ԵՐԵՎԱՆ, 11 հունվարի — Sputnik. Հայաստան-Ադրբեջան նախագահների մակարդակով հանդիպում առաջիկայում նախատեսված չէ, փոխարենը հունվարի երկրորդ կեսին կկայանա արտգործնախարարների հերթական հանդիպումը։ Լրագրողներին այսօր տեղեկացրեց ՀՀ փոխարտգործնախարար Շավարշ Քոչարյանը` հավելելով, որ հանդիպման օրը կհայտարարվի ավելի ուշ։
Այս հանդիպումից, սակայն, Քոչարյանի սպասելիքները մեծ չեն։
«Անզեն աչքով էլ երևում է, որ ղարաբաղյան բանակցությունների այս փուլում առաջընթացն անհնար է, քանի որ կողմերի միջև չկա վստահության մթնոլորտ»,- ասաց նախարարը` հավելելով, որ անհրաժեշտ է այնպիսի մեխանիզմների ներդրումը, որոնք ապագայում կնպաստեն վստահության մթնոլորտի ձևավորմանը։
«Խոսքը վերաբերում է ռազմական գործողությունների դադարեցմանը, զինադադարի ռեժիմի պահպանմանը։ Դրա համար տարբեր մեխանիզմներ են առաջարկվել, և տարբեր պաշտոնյաներ այդ մասին խոսել են»,- ասաց Քոչարյանը` ընդգծելով, որ նման հանդիպումներն այս տեսակետից անհրաժեշտ են։
Քոչարյանի խոսքով` նման հանդիպումները նպաստում են նաև շփման գծի լարվածության թուլացմանը։
«Էլի մենք կորուստներ ունենք, էլի կրակոցներ կան, բայց այնուամենայնիվ, նման հանդիպումները նպաստում են, որ այդ լարվածության մակարդակն իջնի»,- ասաց փոխնախարարը։
Հիշեցնենք, որ Նալբանդյան-Մամեդյարով վերջին հանդիպումը կայացել էր 2017թ-ի դեկտեմբերի 6-ին Վիեննայում:
