ԵՐԵՎԱՆ, 10 հունվարի — Sputnik. Հայաստանի մեծությամբ երկրորդ քաղաք ուղևորվելու պահանջարկը երկու անգամ աճել է, «Փաստարկներ և փաստեր» պարբերականի հետ զրույցում ասել է OneTwoTrip-ի զարգացման գծով տնօրեն Արկադի Գինեսը։
Նրա խոսքով` եթե 2018 թվականին դոլարի կամ եվրոյի կտրուկ տատանում չլինի, ապա արտասահմանյան ուղղությունների գները կպահպանվեն (ռուսաստանցի ուղևորների համար)։
«2018 թվականին առանձին ուղղությունների ավիատոմսերի գների իջեցման վրա կազդեն լոուքոսթերները։ Բյուջետային փոխադրողների իրականացրած ուղղությունների գները կարող են նվազել 5-10%-ով։ Վառ օրինակ է հայկական Գյումրին։ Նախորդ տարվա համեմատ` ձմեռային ամիսներին այդ քաղաքի ուղևորությունների պահանջարկը երկու անգամ աճել է», — նշել է Գինեսը։
Նա ավելացրել է, որ դա կապված է Մոսկվա-Գյումրի լոուքոսթերի բացման հետ։ Գինեսը նաև նշել է, որ տոմսի միջին արժեքը նվազել է 7%-ով։ Այսօր հետադարձ տոմսն արժի 5100 ռուբլի (մոտավորապես 90 դոլար)։
2019 թվականի դեկտեմբերից «Պոբեդա» լոուքոսթերը Մոսկվայի ուղղությամբ թռիչքներ է իրականացնում Գյումրիից։
