ԵՐԵՎԱՆ, 10 հունվարի — Sputnik. Հայաստանը, ամենայն հավանականությամբ, ամբողջությամբ չի ստանա Կարեն Կարապետյանի խոստացած ներդրումները։ Այս մասին այսօր լրագրողներին ասաց Հայաստանի գործատուների հանրապետական միության նախագահ Գագիկ Մակարյանը։
Կարեն Կարապետյանի կառավարությունը խոստացել էր 2017թ–ի ընթացքում Հայաստան բերել մինչև 850 միլիոն դոլար ներդրում։ Բայց, ամենայն հավանականությամբ, բերվել է շուրջ 700 միլիոնը։ Իսկ այստեղ ի՞նչն են համարում ներդրում, պարզ չէ, հավելեց Մակարյանը։ Հաշվարկի ինչ-որ մեթոդիկաներ կան, ներառում են նաև թիրախային արտասահմանյան վարկերը։ Չէ՞ որ դրանց մի մասը տրամադրվում է կապիտալ ներդրումների (նոր ճանապարհներ և ջրանցքներ), մյուս մասը` բիզնեսի համար վարկային ծրագրեր են (այսինքն` բանկերի ակտիվների համալրման)։
«Սակայն ամենաարժեքավոր և անհրաժեշտ ներդրումներն արվում են հիմնական միջոցներում` նոր հաստոցներ, կոնվեյերներ, տեխնոլոգիաներ»,– ասաց Մակարյանը։
Իսկ ահա պետությունը պետք է ներդրում անի մարդկային կապիտալի մեջ, քանի որ որքան էլ գերժամանակակից հաստոցներ արտադրեն, դրանցից օգուտ չի լինի, եթե ոչ ոք չկարողանա աշխատել դրանցով։
«Որքան ակտիվ լինի տնտեսությունը, այնքան շատ անհրաժեշտ կլինեն որակյալ աշխատատեղեր։ Մեզ մոտ կրթության համակարգն արդեն շեղվել է այդ իրականությունից», – ասաց տնտեսագետը։
Վիճակագրական տվյալների համաձայն` 2017թ–ի հունվարից հունիս ընկած ժամանակահատվածում ուղիղ արտասահմանյան ներդրումների մաքուր հոսքը Հայաստան կազմել է շուրջ 17,3 միլիարդ դրամ։ Ներդրումների հիմնական աղբյուրը եղել է Ամուլսարի ոսկու հանքավայրը:
2017թ–ի հունիսի վերջի դրությամբ Ռուսաստանը Հայաստանի ամենախոշոր ներդրողն է։ Հայաստանում աշխատելու տարիներին ռուսական ձեռնարկությունների (մասնավոր և պետական) ուղիղ ներդրումները կազմել են շուրջ 3 միլիարդ 635 միլիոն դոլար։
