ՀՀ Քաղաքացիական օրենսգրքում անցյալ տարի ՀՀ ԱԺ-ի ընդունած փոփոխությունները 2018թ հունվարի 6-ից ուժի մեջ են մտել։ Նոր օրենքում հեշտացվել է երեխաներին ՀՀ քաղաքացիություն տալու հարցը։
ՀՀ ոստիկանության անձնագրային և վիզաների վարչության պետ Մնացական Բիչախչյանը Sputnik Արմենիայի հետ զրույցում, մեկնաբանելով օրենքի մի շարք նոր դրույթները, նշել է, որ եթե նախկինում անհրաժեշտ էր 2 ծնողների համաձայնությունը, ապա այժմ երեխան կարող է ՀՀ քաղաքացի դառնալ նրանցից մեկի համաձայնությամբ։
«Հանդիպում էին դեպքեր, երբ մեկ ծնողը երեխայի հետ տարիներ շարունակ բնակվում էր ՀՀ-ում, սակայն հնարավորություն չէր ունենում դիմելու, քանի որ մյուս ծնողը տարիներ շարունակ բացակայում է ՀՀ-ից կամ միտումնավոր չէր տալիս համաձայնություն»,- ասաց Բիչախչյանը։
Հայաստանում ծնված երեխաներն էլ այսուհետև նոր օրենքով ավելի հեշտությամբ են ՀՀ քաղաքացիություն ստանալու։ ՀՀ քաղաքացիություն ունեցող մեկ ծնողի դիմումն էլ բավական է երեխային ՀՀ քաղաքացիություն տալու համար։
