ԵՐԵՎԱՆ, 9 հունվարի — Sputnik. ՀՀ արտակարգ իրավիճակների և պաշտպանության նախարարությունների աշխատակիցները գնացել են նռնակի ահազանգի հետքով և պարզել, որ Ջրաշեն գյուղի դպրոցի բակի մոտ իսկապես նռնակ կա։ Այս մասին հայտնում է ՀՀ ԱԻՆ մամուլի ծառայությունը։
Հունվարի 9-ին, ժամը 11:43-ին ահազանգ է ստացվել, որ Լոռու մարզի Ջրաշեն գյուղի միջնակարգ դպրոցի սանհանգույցի հարևանությամբ աշակերտները նռնակ են գտել:
Դեպքի վայր են մեկնել մեկ մարտական հաշվարկ, մարզային փրկարարական վարչության օպերատիվ և ՊՆ սակրավորների խմբերը: Պարզվել է, որ դպրոցի դրսի արտաքնոցի հարևանությամբ հայտնաբերվել է «G1» ձեռքի նռնակ:
Փրկարարները սահմանազատել են տարածքը, իսկ ՊՆ սակրավորական խումբը վնասազերծել է նռնակը և հանձնել ոստիկանության Սպիտակի բաժնի աշխատակիցներին:
