ԵՐԵՎԱՆ, 9 հունվարի – Sputnik. Համացանցում հայտնվել է Երևանի կենտրոնում տեղի ունեցած ավտովթարի տեսանյութը. այն ճանապարհային ոստիկանության 2 տեսուչի մահվան պատճառ էր դարձել։
Ինչպես արդեն տեղեկացրել էինք` հունվարի 8–ին, ժամը 04:40-ի սահմաններում, Երևան քաղաքի Սայաթ-Նովա պողոտայի և Աբովյան փողոցի խաչմերուկում բախվել են «ԲՄՎX6» մակնիշի և «Տոյոտա» մակնիշի ավտոմեքենաները, որից հետո «ԲՄՎX6» մակնիշի ավտոմեքենան դուրս է եկել երթևեկելի գոտուց և հարվածել գովազդային վահանակին:
Ավտովթարի հետևանքով «Տոյոտա» մակնիշի, 243 II 02 հաշվառման համարանիշի ավտոմեքենայի վարորդ 29–ամյա Արեգ Դավթյանն ստացած մարմնական վնասվածքներից հիվանդանոց տեղափոխվելու ճանապարհին մահացել է, իսկ ուղևոր 34–ամյա Խաչիկ Գասպարյանը մահացել էր հիվանդանոցում։
«ԲՄՎX6»-ի վարորդը, որ փախուստի էր դիմել դեպքի վայրից, հայտնի «Ճվճըվ Արոյի» որդին է` Սարգիս Վարդանյանը։ Նրան այսօր ձերբակալել են:
