ԵՐԵՎԱՆ, 7 հունվարի — Sputnik. Բելառուսական Գոմել քաղաքում հյուրախաղերի ժամանակ 20-ամյա օդային մարմնամարզիկ Յուլյա Տիկաևան 4 մետր բարձրությունից ընկել է ցանցի կողքը։ Այս մասին հայտնում է Spurnik Բելառուսը։
Այս օրերին Գոմելի կրկեսում ցուցադրվում է «Ձմեռ պապն ու Աֆրիկայի առյուծները» կրկեսային ներկայացումը։ Պաստառը տեղեկացնում է, որ «մարմնամարզիկները 9 հարկանի շենքի բարձրության վրա ֆենոմենալ հնարքներ են կատարում»։
Ականատեսների խոսքով, Յուլյա Տիկաևան ընկել է մոտ չորս մետր բարձրությունից՝ ելույթի ժամանակ հնարքներ կատարելիս։ Մարզիկը լավ չի բռնել աղջկան, ու նա ընկել է ապահովության ցանցից այն կողմ՝ դեմքով ներքև։
Դեպքը տեղի է ունեցել հունվարին 5-ի երեկոյան։ Սոցիալական կայքերում մարդիկ պատմում են իրենց տպավորությունների մասին ու արագ ապաքինում մաղթում Յուլյային։
ВКонтакте սոցիալական կայքում այսպիսի հաղորդագրություն է հրապարակվել․ «Յուլյան դեռ բժիշկների հսկողության տակ է։ Գանգը չի վնասվել, կոտրվածքներ չկան։ Գլխի հեմատոմա կա, բայց բժիշկներն ասում եմ, որ վիրաբուժական միջամտության կարիք դեռ չկա։ Թե ինչպես նա իրեն կզգա, ժամանակը ցույց կտա։ Մենք բոլորս մտովի նրա հետ ենք։ Եվս մեկ անգամ շնորհակալություն անտարբեր չլինելու համար»։
