ԵՐԵՎԱՆ, 6 հունվարի — Sputnik. Մայամիում մի կին ընկել է հայտնի ռուս երգիչ Ֆիլիպ Կիրկորովի հետևից՝ պահանջելով ներողություն խնդրել և տեսախցիկով նկարել է դա, հաղորդում է «Կոմսոմոլսկայա պրավդան»։
«Անպատկառ տիպ։ Ներողություն խնդրեք ինձանից` ձեր կոպիտ խոսքերի համար։ Էստրադայի թագավոր, ո՞վ է ձեզ իրավունք տվել։ Եթե դուք ապրում եք Ռուսաստանում, ապա կարող եք կոպտե՞լ մարդկանց։ Անխիղճ մարդ, ո՞վ է ձեզ իրավունք տվել ինձ ռուս մարմնավաճառ անվանել։ Ինչ է, ես ձեզ համար մարմնավաճա՞ռ եմ։ Դուք ի՞նչ գիտեք իմ մասին», — իր տեսանյութում ասում է կինը։
Տեսանյութում կինը պնդում է, որ Կիրկորովը իրեն մարմնավաճառ է անվանել և երեխայի ներկայությամբ հայհոյել։
«Ներողություն խնդրեք, դուք տղամարդ եք։ Դե վերջ, Ֆիլ, ես ձեզ դատի կտամ։ Դուք սիրում եք բոլոր թերթերին դատի տալ, իսկ ես ձեզ դատի կտամ` ինձ վիրավորելու համար», — ասում է կինը։
Կիրկորովը չի արձագանքում այդ ամենին։ Տեսախցիկով հետապնդումը շարունակվում է մի քանի րոպե, որից հետո երգիչը թաքնվում է հագուստի խանութում։
Ավելի վաղ հաղորդվել է, որ Մայամիի ռուսալեզու բնակչուհին հարձակվել է Կիրկորովի վրա։ Երբ նա` ընտանիքի հետ միասին, խանութներից մեկում մոտեցել է սիրելի երգչին, որպեսզի շփվի և ինքնագիր վերցնի, երգիչը վիրավորել է երկրպագուին և նրա ամուսնուն` երեխայի աչքի առաջ։
Կիրկորովը հաճախ է ընկնում սկանդալային պատմությունների մեջ։ Առավել հայտնի է 2004թ-ի միջադեպը։ Այդ ժամանակ լրագրող Իրինա Արոյանը հարցրել է նրան, թե ինչով է պայմանավորված այդքան շատ ռեմեյքերի քանակն իր երգացանկում։ Կիրկորովը վիրավորել է Արոյանին։
«Ինձ նյարդայնացնում է ձեր վարդագույն շապիկը, ձեր կուրծքը և ձեր միկրոֆոնը», — այդ ժամանակ հայտարարել է Կիրկորովը։
Դոնի Ռոստովի դատարանը մեղավոր է ճանաչել Կիրկորովին լրագրողին հրապարակավ վիրավորելու մեջ և 60 000 ռուբլի տուգանել։
