ԵՐԵՎԱՆ, 5 հունվարի — Sputnik. Սամվել Թումանյանն առաջին տղամարդն է, որ հաղթել է «Թոփ մոդել ուկրաինական ձևով» շոուում, ինչից հետո նրա կյանքն անմիջապես փոխվել է: Այդ մասին նա պատմել է Viva ուկրաինական կայքին:
Տղան փոքրուց զբաղվել է սպորտով` ըմբշամարտ, լող, մարտեր առանց կանոնների: Նույնիսկ ոչ վատ արդյունքներ է գրանցել, բայց ծնոտի վնասվածքի պատճառով ստիպված է եղել հրաժարվել սիրելի գործից:
Բացի «Թոփ մոդել ուկրաինական ձևով» շոուի ընտրական փուլից, Սամվելը նաև ձգտել է հայտնվել Black Star թիմում` մասնակցելով «Молодая Кровь — За Бугром» շոուին: Նրան հաջողվել է ներառվել լավագույն հարյուրի մեջ, բայց նախագծի ավարտին չի հասել: Սամվելը խոստովանել է` եթե մոդելային կարիերան չլիներ, ռեփով կզբաղվեր:
«Եթե մոդել չդառնայի, Black Star-ում ռեփ կերգեի: Բայց ես հետևում էի «Թոփ մոդել ուկրաինական ձևով»-ի նախորդ թողարկումներին, ինձ դուր էին գալիս նախագծի ձևաչափն ու մասշտաբները», — ասել է նա:
Սամվելի խոսքով` ծնողները հոռետեսորեն են վերաբերվել այդ նախագծին, հայրն ընդհանրապես համոզել է, որ հրաժարվի շոուին մասնակցելու գաղափարից, ասել է, որ նման ոլորտում տղան իրեն լավ չի զգա, քանի որ նորաձևության աշխարհում բոլոր տղամարդիկ ոչ ավանդական սեռական կողմնորոշում ունեն:
«Իսկ մայրս չեզոք վերաբերմունք ուներ, քանի որ ի սկզբանե գիտեր` ինձ հետաքրքրում է այդ ոլորտը: Իսկ այսօր ծնողներս դիտում են շոուի յուրաքանչյուր դրվագը, թեև նախագծից անմիջապես հետո եկա հորս մոտ և պատմեցի բոլոր փորձությունների մասին, թե ինչպես էինք բեմում քայլում ստրինգներով, ինչպես էի «աղջիկ դարձել», ինչպես էին ներկում մեր շուրթերը», — ավելացրել է մոդելը:
Սամվելի հայրն ասել է, որ դիտելու է շոուն, և թող գեթ մեկը «հանդգնի որդուն որևէ բան ասել կամ ծուռ նայել»:
«Հայրս Հայաստանից եկել է 17 տարեկանում: Լեզուն չի իմացել։ Ոչ միայն քաղաքին է անծանոթ եղել, այլ նույնիսկ երկրին: Ուկրաինայում է ծանոթացել մորս հետ: Երբ նրանք 21 տարեկան են եղել, ծնվել եմ ես», — ավելացրել է Սամվելը:
Նա պատմել է նաև, որ ընտանիքը մշտապես գումարային խնդիրներ է ունեցել: Հայրը փորձել է ընկերոջ հետ բիզնես սկսել, բայց ընկերն անհետացել է` հետը տանելով ամբողջ գումարը, որ Սամվելի ծնողները հավաքել էին բնակարան գնելու համար:
Ընտանիքը ստիպված է եղել ապրել վարձակալած բնակարաններում:
Իսկ այսօր Սամվելը պայմանագիր ունի Չինաստանի հետ, մի քանի գործակալություններ հրավիրել են Իտալիա, Հնդկաստան, բայց խնդիրն այն է, որ տղա մոդելների ծախսերը (տոմս, հյուրանոց) չեն հոգում:
