ԵՐԵՎԱՆ, 5 հունվարի — Sputnik. Հունվարի մեկից հետո բենզինի ու գազի թանկացումը նախապես պլանավորված էին. Sputnik Արմենիայի հետ զրույցում, պարզաբանելով նոր թանկացումների իրական պատճառները, ասաց ՀՊՏՀ ինովացիոն և ինստիտուցիոնալ հետազոտությունների կենտրոնի ղեկավար Ատոմ Մարգարյանը։
«Թանկացումները պլանավորված էին Հարկային նոր օրենսգրքով և ԵԱՏՄ մաքսային օրենսդրության ուժի մեջ մտնելով: Նախ ավարտվել է Հայաստանի համար սահմանված 2 տարի արտոնյալ ժամկետը, և 2018-ից մինչև 2022թ-ը շուրջ 800 զգայուն կամ արտոնյալ խմբի ապրանքների գծով պետք է ակցիզային հարկի մասով հավասարեցվեն ԵԱՏՄ մյուս երկրների դրույքաչափերին»,- ասաց Մարգարյանը:
Ակցիզային հարկի բարձրացման պատճառով վառելիքի, ծխախոտի և ալկոհոլային խմիչքների գներն արդեն իսկ Հայաստանում բարձրացել են: Առաջին թանկացումներն Ամանորից անմիջապես հետո իրենց «մաշկի» վրա զգացին հայաստանցի վարորդները՝ գազալցակայաններում ու բենզալցակայաններում ավտոմեքենաները վառելիքով լիցքավորելու ժամանակ:
Հենց հունվարի 1-ից 10-15 տոկոսով բարձրացան բենզինի, դիզվառելիքի ու սեղմված գազի գները: Եթե մինչ այդ բենզինի Regular տեսակի մեկ լիտրն արժեր 390 դրամ, այսօր այն վաճառվում է 430 դրամով, ավելի բարձրակարգ՝ Premium տեսակի բենզինը 430 դրամից հասել է 450 դրամի: Դիզելային վառելիքը 390 դրամից հասել է 440-ի, իսկ մեկ խորանարդ մետր սեղմված գազը 180-190 դրամից՝ 210-220 դրամի:
Այս թանկացումների պատճառն, ըստ տնտեսագետի, հունվարի 1-ից բարձրացած ակցիզային հարկն է:
«Բենզինի 1 տոննայի ակցիզային հարկը թանկացել է մինչև 40 000 դրամ, սեղմված գազի 1000 խմ-ի ակցիզային հարկը, որ 8300 դրամ էր, հունվարի 1-ից հասել է 25 000 դրամի: Եվ, այո, մենք տեսնում ենք, որ լցակայաններում ցուցանակներին արդեն նոր գներ են գրված»,- նշեց նա
Ինչ վերաբերում է ալկոհոլային խմիչքներին, դրանց թանկացումները տոնական իրարանցման մեջ առայժմ աննկատ են մնում, բայց նոր հարկային ու մաքսային իրողությունների համաձայն` ընդհանուր առմամբ թանկանալու են 24.4%- ով:
Այսպիսով, Ատոմ Մարգարյանի դիտարկմամբ, Հայաստանն ընդունում է ԵԱՏՄ բոլոր անդամ երկրների համար սահմանված խաղի նույն կանոնները:
2018թ-ի հունվարի 1-ից ավարտվել է մեր երկրի համար ԵԱՏՄ անդամակցության պահից ի վեր սահմանված արտոնյալ ժամկետը:
ՀՀ իշխանությունները, ԵԱՏՄ-ին անդամակցելով, խոստացել էին թուլացնել ՀՀ տնտեսության կախվածությունը ներմուծվող ապրանքներից՝ խթանելով սեփական արտադրությունն ու արտահանումը:
Եվրասիական տնտեսական միությունը հիմնադրվել է 2014 թվականի մայիսի 29-ին, ուժի մեջ մտել 2015 թվականի հունվարի 1-ից։ Հայաստանը ԵԱՏՄ-ին անդամակցելու համաձայնագիրը ստորագրել է 2015թ-ի հոկտեմբերի 9-ին:
