Նելլի Դանիելյան, Sputnik.
Կար ժամանակ, երբ ՀՀ ֆինանսների ներկայիս նախարար Վարդան Արամյանը երազում էր հեծանիվ ունենալ։ «Այդ նվերը ստանալու համար հայրս իմ առջև երկու պայման էր դրել` դառնալ Երևանի չեմպիոն իմ մարզաձևում` ձյուդոյում, և քառորդն ավարտել գերազանց։ Ես կատարեցի երկու պայմանն էլ և նվեր ստացա «Շկոլնիկ» հեծանիվ»,– պատմում է Արամյանը և հավելում, որ հոր նվերը մինչև հիմա մանկության ամենավառ հիշողությունն է։
Առողջապահության նախարար Լևոն Ալթունյանի համար մանկության ամենահիշարժան պահը Ամանորի գիշերը չքնելը կամ ուշ քնելն էր։ Այդ գիշերը միակն էր, երբ ծնողները թույլ էին տալիս իրենց հետ երկար նստել հեռուստացույցի առջև։ Մանկության Նոր տարին Ալթունյանը նկարագրում է մի քանի խոսքով` տոնածառ, հայրիկ, մայրիկ, նվերներ ու երկար գիշեր։
Գյուղատնտեսության նախարարը ևս հակիրճ է նկարագրում իր մանկության լավագույն հուշերը` «ծնողներիս հետ տոնածառ զարդարելը»։
Բնապահպանության նախարար Արծվիկ Մինասյանի մանկության հիշողություններում մնացել է գյուղի մեծ տունը, բազմանդամ ընտանիքն ու մանդարինի բույրը։
«Քանի որ մեր ընտանիքը բազմանդամ է, ամեն մեկը խառը–խշտիկ իր գործն էր անում այդ ժամանակ, փոքրերն ընկնում էին ոտքերի տակ։ Ես էլ, քանի որ ամենափոքրն էի, միշտ խանգարողի դերում էի»,– պատմում է նախարարը։ Բայց մանկության ամենավառ հիշողությունը մանդարինի բույրն է։ Այն մինչ օրս էլ ամեն անգամ Արծվիկ Մինասյանին մտովի տանում է մանկություն ու հիշեցնում հեռավոր տոնական եռուզեռը։ «Հենց մանդարինի հոտը գալիս էր, ես գիտեի, որ Նոր տարին մոտենում է»,– ասում է նա։
ՀՀԿ փոխնախագահ, ԱԺ պատգամավոր Արմեն Աշոտյանը վստահեցնում է` Ամանորի հետ կապված մանկության ոչ մի վատ հիշողություն չունի, քանի որ ընտանիքում իրեն բոլորը միշտ շատ են սիրել։ Իսկ ամենավառ ու ամենադրական հիշողությունը Ձմեռ պապի հետ հանդիպումն է։ «Հայրս զգեստափոխվել էր ու որպես Ձմեռ Պապ եկավ ու ինձ նվեր հանձնեց։ Ես չճանաչեցի նրան»,– ասում է Աշոտյանն ու հավելում, որ միայն տարիներ անց է իմացել, թե իրականում ով է եղել Ձմեռ Պապի կերպարի տակ։
