ԵՐԵՎԱՆ, 31 դեկտեմբերի — Sputnik. Ինչպես արդեն տեղեկացրել էինք՝ այսօր, ժամը 11:40-ի սահմաններում Ոստիկանության Թալինի բաժին ահազանգ է ստացվել քաղաքացու կողմից, ով հայտնել է, որ Թալին քաղաքի Թիվ 2 հիմնական դպրոցի նկուղում ռումբ է դրված:
Փրկարարները, ԱԱԾ աշխատակիցները և Ոստիկանության սակրավորները շտապել են դեպքի վայր: Որոնողական աշխատանքների արդյունքում ռումբ չի հայտնաբերվել:
Shamsyan.com-ի տվյալներով՝ կարճ ժամանակում Ազգային անվտանգության ծառայության և Ոստիկանության աշխատակիցները պարզել են, թե որ հեռախոսահամարից է ահազանգը ստացվել: Ահազանգողը եղել է Թալին քաղաքի բնակիչ, նշված դպրոցի սան, 9-ամյա Հ. Հ.-ն, ով ծնողների հետ հրավիրվել է Ոստիկանության Թալինի բաժին, կատարվածի մասին բացատրություն է տվել, որից հետո երեխային հանձնել են ծնողներին: Փաստի առթիվ Ոստիկանության Թալինի բաժնի հետաքննչական բաժանմունքում նյութեր են նախապատրաստվում:
