ԵՐԵՎԱՆ, 30 դեկտեմբերի — Sputnik, Խաչիկ Չախոյան. Անգլիական Պրեմիեր լիգայում կայացան 21-րդ տուրի հանդիպումները, և այսօր` դեկտեմբերի 30-ին, «Մանչեսթեր Յունայթեդը» սեփական հարկի տակ մրցեց «Սաութհեմփթոնի» հետ: Հենրիխ Մխիթարյանը մասնակցեց խաղի հանդիպման մեկնարկից ու փոխարինվեց խաղի ավարտից 25 րոպե առաջ:
Անկեղծ ասած, այս հանդիպումը մեր հավաքականի առաջատարի համար չի կարելի դասել լավագույնների շարքը: Հենրիխի մոտ ոչ միշտ էին ստացվում նախևառաջ լայնակի կամ երկար փոխանցումները, ինչի պատճառով դաշտի տերերի գրոհը զարգացում չէր ստանում: Երևում է, որ Մխիթարյանը լավ մարզավիճակում չէ: Բայց դե պարզ է, թե ինչու: Երկար ժամանակ մնալով պահեստայինների նստարանին կամ մարզչի հայտացուցակից դուրս` հայ ֆուտբոլիստը չէր էլ կարող լավ մարզավիճակում լինել:
Դրան գումարած այն, որ հոգեբանորեն էլ Հենրիխը կարող է որոշակի ընկճվածություն ունենալ: «Սաութհեմփթոնի» հետ խաղադաշտ դուրս գալն առաջին իսկ վայրկյաններից երկու բան կարող է նշանակել: Կա՛մ Մոուրինյոն պարզապես դիմում է ռոտացիայի` ֆուտբոլիստներին վերականգնվելու հնարավորություն տալով, կա՛մ էլ Ժոզեն նորից մտածում է Հենրիխին թիմում պահելու մասին:
Իհարկե, նման պայմաններում իրականությանն ավելի մոտ է առաջին տարբերակը, բայց երկրորդն էլ բացառել չի կարելի: Մխիթարյանի նկատմամբ մի շարք ակումբների կողմից հետաքրքրությունը գուցե Մոուրինյոնին ստիպել է վերանայել Հենրիխի հետ կապված իր որոշումը:
Հունվարի տրանսֆերային պատուհանը շատ մոտ է բացվելուն: Ու թե ինչ կա Մոուրնյոյի մտքում, կիմանանք շատ շուտով: Սակայն ինչ էլ ուզում է լինի, Մխիթարյանը մարզավիճակ կարող է ձեռք բերել միայն խաղալով ու վստահություն զգալով: Սակայն Մոուրինյոյի դեպքում երևի տեղին է ասել` երկու երանի մի տեղում չի լինում:
