ԵՐԵՎԱՆ, 29 դեկտեմբերի — Sputnik. Հայաստանի հավաքականի ավագ Հենրիխ Մխիթարյանի անունը ներառվել է ամերիկյան ESPN սպորտային հեռուստաալիքի կազմած լավագույն հարձակվող կիսապաշտպանների տասնյակում։
«Ինչպես Սինձա Կագավայի, այնպես էլ Հենրիխ Մխիթարյանի համար բարդ էր Դորտմունդի «Բորուսիայից» հետո հարմարվել «Մանչեսթեր Յունայթեդին»։ Բայց Բունդեսլիգայի լավագույն խաղացողներից մեկը, դիպուկ փոխանցումների գուրուն ժամանակ առ ժամանակ փայլեց», — նշված է վարկանիշում։
ESPN-ը հույս է հայտնում, որ հայ ֆուտբոլիստի դրությունը կբարելավվի մանկունիանցիների թիմում։ Միաժամանակ հեռուստաալիքը հիշեցնում է, որ սկզբում «Բորուսիայում» նույնպես ամեն ինչ այնքան լավ չէր։
«Հենրիխը ոգեշնչվեց, երբ Թոմաս Տուխելը (Borussia Dortmund-ի մարզիչ` խմբ.) նրան հանձնեց «Թենիսի ներքին խաղ» գիրքը։ Հուսով ենք, որ շուտով կտեսնենք նաև Ժոզե Մոուրինյոյին», — նշում է ցուցակի հեղինակը։
Վարկանիշի համաձայն` Մխիթարյանը 10 լավագույն կիսապաշտպանների շարքում 9-րդն է։ Այսպիսով հայ կիսապաշտպանն ընդգրկվել է լավագույն ֆուտբոլիստների հարյուրյակում, որը կազմել է ամերիկյան հեղինակավոր մարզական հեռուստաալիքը։
