Հանրապետության գրեթե ողջ տարածքում այս պահին ձյան ծածկույթը բացակայում է։ Այս մասին այսօր լրագրողների հետ հանդիպմանն ասաց ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանը` հավելելով, որ դա աննախադեպ երևույթ է տարվա այս եղանակի և Հայաստանի բնակլիմայական պայմանների համար։
«Նույնիսկ հանրապետության ամենաբարձրադիր հատվածներում (Ամասիա, Ղուկասյան, Աշոցք) ձյան ծածկը բացակայում է»,- ասում է Սուրենյանը։
Բայց առաջիկա օրերին էլ` մինչև դեկտեմբերի 31-ը, Հայաստանում ձյուն թերևս չի տեղա, քանի որ դեկտեմբերի 28-ից սկսած` Հայաստան տաք օդի նոր հոսանք է եկել Սիրիայից։
Իսկ հունվարի 1-ին Հայաստան կգա արդեն տեղումնաբեր ցիկլոնը, և հունվարի 1-2-ին հանրապետությունում տեղումներ կդիտվեն, բայց դարձյալ հիմնականում անձրևի տեսքով։
«Միայն շատ բարձրադիր գոտիներում հնարավոր է, որ անձրևի հետ թաց ձյան փաթիլներ երևան»,- ասաց Սուրենյանը։
Միաժամանակ, ամպամածությունը կնպաստի գիշերային ժամերին ջերմաստիճանի բարձրացմանը։