Եթե Հայաստանը սահմանադրական փոփոխությունների արդյունքում գնում է դեպի խորհրդարանական կառավարման, պետք է առաջին հերթին հարգանք լինի խորհրդարանի աշխատանքի նկատմամբ։ Ասել է ԱԺ «Ծառուկյան» խմբակցության պատգամավոր Իվետա Տոնոյանը։ Նա նշել է, որ ամենակարևոր նախագծերը կառավարությունն ԱԺ է ներկայացնում տարեվերջին` հապշտապ ռեժիմով։ Արդյունքում` պատգամավորներն ուղղակի ֆիզիկապես չեն հասցնում պատշաճ ուսումնասիրել դրանք։
Ինչ վերաբերում է խորհրդարանում տեղի ունեցած վերջին միջադեպին, երբ «Ծառուկյան» խմբակցության պատգամավոր Նապոլեոն Ազիզյանը «կողմ» էր քվեարկել հարկային փոփոխությունների փաթեթին, ապա Տոնոյանն ասաց։
«Իհարկե, պատահաբար, ինքը և՛ բանավոր այդ մասին ասաց, և՛ գրավոր քարտուղարությանը ներկայացրեց, և՛ խմբակցության քարտուղարն ամբիոնից խոսեց։ Բայց, մատնանշելով վարման կարգը, ԱԺ Կանոնակարգ օրենքը, քվեարկության արդյունքը որևէ կերպ չվերանայվեց»,–ասաց Տոնոյանը` հիշեցնելով, որ փոխադարձ հարգանքի բացակայության պայմաններում աշխատելն ինքնանպատակ համարելով խորհրդարանի աշխատանքի վերջին օրը «Ծառուկյան» դաշինքը լքել էր նիստերի դահլիճը։
Նշենք, որ իբրև սահմանադրական օրենք, «Դատական օրենսգրքում փոփոխություններ և լրացումներ կատարելու մասին» օրենքի նախագիծը ընդունելու համար անհրաժեշտ էր, որ կողմ քվեարկեր պատգամավորների 3/5-րդը, այսինքն՝ 63 պատգամավոր:
Քվեարկությունից առաջ «Ելք» խմբակցության ղեկավար Նիկոլ Փաշինյանը «Ծառուկյան» խմբակցությանը հորդորեց չմասնակցել քվեարկությանը, որպեսզի օրինագիծը չընդունվի: Բայց Նապոլեոն Ազիզյանը քվեարկել էր։
