ԵՐԵՎԱՆ, 29 դեկտեմբերի — Sputnik. Կրասնոդարի №4 վարժարանի առաջին դասարանի աշակերտ Մակարովի տեսանյութը, որում երեխան լաց է լինում և չի ցանկանում ձմեռային արձակուրդ գնալ, սոցցանցերում շատ հայտնի է դարձել, գրում է RT–ն։ Նրանց հաջողվել է գտնել Մակարի ուսուցչուհուն և պարզել, թե ինչպես է նա կարողանում նման սեր սերմանել երեխաների մեջ։
Տեսանյութը, որում Կրասնոդարի առաջին դասարանի աշակերտը լացում է կիսամյակի ավարտի պատճառով, մի քանի օր առաջ Facebook էր տեղադրել նրա հայրը` Անդրեյ Տրեգուբովը։
«Համացանցի օգտատերերին հետաքրքրել է ոչ միայն երեխայի անսովոր պահվածքը` կապված արձակուրդ գնալու հետ, այլև ուսուցչուհին, որը կարողացել է դպրոցի նկատմամբ նման սեր սերմանել տղայի մեջ։ Տեսանյութի տակ մի շարք մեկնաբանություններ էին թողել` Մակարի դասղեկի հետ ծանոթացնելու խնդրանքով։ Եվ այսպես, ծանոթացեք` տարրական դասարանների ուսուցչուհի Օքսուզյան Մարինա Աշոտի», – գրված է տեսանյութի տեքստում։
Օքսուզյանի խոսքով` նա երեխաների հետ շփումներում առաջնորդվում է դպրոցի տնօրենի կանոններով. «Սիրով մոտեցեք երեխաներին, և նրանք ձեզ կտան իրենց սերը»։ Օքսուզյանը նաև համեստորեն նշում է, որ երեխաները հաճույքով են դպրոց գալիս, ինչի համար նրանց մոտիվացնում են ծնողները։ Իսկ նրա խնդիրը` այդ սերը պահպանելն է։
