ԵՐԵՎԱՆ, 29 դեկտեմբերի — Sputnik. Տարվա առաջին ամիսը, որպես կանոն, ամենացուրտն է։ Բայց լինում են նաև բացառություններ։ 2018-ը, ըստ «Հիդրոմետ» ծառայության կանխատեսումների, թերևս կլրացնի հենց բացառությունների շարքը։
Մինչ այդ, ԱԻՆ–ը հիշեցնում է, թե ինչ եղանակային անոմալիաներ են գրանցվել նախկինում հունվար ամսին։
Տարվա առաջին ամսվա միջին ամսական ջերմաստիճանը, ըստ ԱԻՆ–ի, կազմում է —6.7C։ Բայց 1961 թ. հունվարի 24-ին Հայաստանում գրանցվել է ամենացածր ջերմաստիճանը։ Շիրակի մարզի Պաղակնի տարածքում այդ օրը ջերմաստիճանի սանդղակն իջել է մինչև —42.2C։
Երևանում հունվարի միջին ջերմաստիճանը —3 —4 C է, սակայն լինում են ձմեռներ, երբ այն գերազանցում է —10 C–ը։
Ամենացուրտ հունվարները հանրապետության տարածքում դիտվել են 1933, 1950, 1957, 1964, 1972, 1977, 1983, 2002, 2007, 2008 թթ.–ներին:
Երևանում ամենացածր ջերմաստիճանը գրանցվել է 1972 թ. հունվարի 21-ին`-29.5 C։
Ամենատաք հունվարները եղել են 1963, 1966, 1987, 2003, 2004, 2010, 2014 թթ–ներին։
1966 թ.–ին շատ շրջաններում հունվարի միջին ամսական ջերմաստիճանը եղել է դրական, իսկ հյուսիս-արևելյան և հարավ-արևելյան շրջաններում ` +6 — +9 C: Երևանում նույնպես այդ տարվա հունվարին գրանցվել է +5 C:
Ամենատաք հունվարը գրանցվում է Բագրատաշենում ` +0,3 C, Մեղրիում` +1,6 C: Այս շրջաններում նվազագույն ջերմաստիճանը —17…-200C-ից ցած չի իջնում:
Տեղումների առումով հունվարին ամենաաղքատն Արարատյան դաշտն ու Մեղրիի տարածաշրջանն են։
Ամենաշատ ձյունը տեղացել է 1957, 1969, 1973, 1978, 1991, 2006, 2010 թթ.–ներին, երբ տեղումների քանակը 1.5-3 անգամ գերազանցել է նորման։
Ամենաերկարատև ու առատ ձյունը տեղացել է Գյումրիում 1973 թ.` 62 ժամ անընդհատ և Երևանում` 1969 թ.–ին` 47 ժամ:
Ամենաչոր հունվարները դիտվել են 1936, 1939, 1955, 1971, 1979, 1989, 1997, 1999, 2001, 2009 թթ.–ներին։ Այս տարիներին հովտային շրջաններում տեղումներ ընդհանրապես չեն եղել։
Հունվար ամիսը հայտնի է նաև մառախուղներով ու քամիներով։ Երևանում և Գյումրիում եղել են տարիներ, երբ ամբողջ ամիսը մառախլապատ է եղել։ Իսկ ամենաուժեղ քամին Երևանում եղել է 1956 թ–ին` 34 մ/վ արագությամբ:
Թե ինչ անակնկալ կմատուցի 2018-ի հունվարը հայաստանցիներին, դեռ պարզ չէ։ Բայց հիդրոմետ ծառայությունը վստահեցնում է, որ ամսվա առաջին տասնօրյակը կշարունակի տաք լինել, նույնիսկ` անոմալ տաք։ Իսկ տեղումների քանակը հունվարին կլինի նորմայից ավելի:
