ԵՐԵՎԱՆ, 29 դեկտեմբերի — Sputnik. Շվեյցարիայի հավաքականը մշտապես սպառնալիք է ներկայացրել, ուստի պետք էր առավելագույն հավաքված խաղալ։ Այդ մասին Ռուսաստանի հավաքականի հարձակվող Անդրեյ Ալթիբարմաքյանը պատմել է Սպորտ Էքսպրես սպորտային կայքին։
Խոստումնալից հայ հոկեյիստն աշխարհի երիտասարդական առաջնության խաղում Շվեյցարիային 5։2 հաշվով հաղթելուց հետո խոսել է հակառակորդի հիանալի խաղի մասին։
«Հանդերձարանում ասում էին, որ չի կարելի թուլանալ, քանի որ ընդամենը մեկ տափօղակով էինք առաջ (երկրորդ և երրորդ խաղակեսի միջև` խմբ.)։ Շվեյցարացիները կարող էին բռնացնել մեզ հակագրոհի վրա», — ասել է Ալթիբարմաքյանը։
Նրա խոսքով` մարզիչը պնդել է խաղալ պաշտպանական գծում։
«Ամբողջ խաղն ընթանում էր նրանց գոտում, և չէր կարելի հակագրոհ թույլ տալ», — ասել է հոկեյիստը։
Նա նշել է, որ չնայած երիտասարդ տարիքին և շվեյցարական հավաքականի նոր կազմին, տղաները բարդ սխեմաներով են խաղացել։
«Այստեղ բոլորի հետ խնդիրներ կլինեն։ Ցանկացած մեկը կարող է տրամադրվել և դիմակայել մեզ, Կանադային և ԱՄՆ-ին», — եզրափակել է մարզիկը։
Անդրեյ Ալթիբարմաքյանը թեև բնիկ պետերբուրգցի է, բայց նրա պապը Ռուսաստանի հյուսիսային մայրաքաղաք է տեղափոխվել Աբխազիայից, որտեղ բնակվել են նրա ազգականները։ Այս անսովոր ազգանունն առաջացել է Հայոց ցեղասպանությունից հետո. այդ ժամանակ Անդրեյի նախապապը հրաշքով ողջ է մնացել, բայց օսմանական գերությունում զրկվել է չորս մատից։ Այնտեղ նրան թուրքերեն անվանել են «Ալթի Բարմաք»` «վեցմատանի»։ Հետո նա հայտնվել է Տրապիզոնում, որտեղ հիմա բնակվում է նրանց տոհմի ճյուղերից մեկը` Ալթիբարմաքյանների զուգահեռ ճյուղը։
Նշենք, որ Ռուսաստանի երիտասարդական հավաքականի կազմում աշխարհի առաջնությունում հանդես են գալիս երեք հայեր` հարձակվողներ Անդրեյ Ալթիբարմաքյանը, Ալեքսեյ Փոլոդյանը և Արտյոմ Մանուկյանը։ Փոլոդյանը թեև գոլ է խփել չեխերի հոկեյի երիտասարդական առաջնության մեկնարկային խաղում, սակայն նրանց թիմը պարտվել է։ Արդյունքում Ռուսաստանը զիջել է Չեխիայի 5։4 հաշվով։
