ԵՐԵՎԱՆ, 28 դեկտեմբերի — Sputnik. Աղբահանության բիզնեսը պետք է լինի ծախսափակ։ Այս մասին այսօր կառավարության նիստում հայտնեց ՀՀ վարչապետ Կարեն Կարապետյանը։
Հիմա աղբահանության գումարի երկու երրորդը պետական բյուջեն է ծածկում։ Իսկ տեղի իշխանությունները` իմանալով, որ պետական հատկացումները օգնության կգան, նրանք առանձնապես չեն փորձում հավաքել աղբի գումարները։
Սակայն օժանդակությունները հիմնականում նախատեսված են կապիտալ ծախսերի համար, ընդգծեց վարչապետը։ Այսինքն այն քաղաքապետարաններն ու գյուղապետարանները, որոնք դա հասկանան, լրացուցիչ ֆինանսավորում կստանան։
Այսօր կառավարությունը հաստատեց Սյունիքի աղբավայրերի միացման ծրագիրը։ Ամբողջ մարզում երկու աղբավայր կմնա։
Աղբավայրերում աղբը տեսակավորվելու է` առանձնացվելու են թուղթը, ստվարաթուղթը, ապակին ու պլաստիկը։ Երկրորդական հումքի յուրաքանչյուր տեսակի համար 1 500 մարդու հաշվարկով մեկ աղբաման է տեղադրվելու։
