ԵՐԵՎԱՆ, 28 դեկտեմբերի — Sputnik. Aysor.am կայքը իր ունեցած տեղեկության հիման վրա, որի համաձայն, բանակ կարագի անվան տակ մարգարին է մատակարարվել, հարցում է ուղարկել ՀՀ ԱԱԾ ծառայության տնօրեն Գեորգի Կուտոյանին:
Հարցին ի պատասխան ստացվել է հետևյալ պատասխանը. «ՀՀ ԿԱ ԱԱԾ քննչական վարչությունում քննվող քրեական գործի շրջանակներում պարզվել է, որ 2016-2017թթ. ընթացքում ՀՀ պաշտպանության նախարարության կարիքների համար սերուցքային կարագի փոխարեն, երկու ընկերությունների կողմից մատակարարվել են ՀՀ-ում արտադրված 172.300 կգ «Մարգարին» և 14.250 կգ «Սպրեդ» տեսակի ապրանքներ, որոնք նույնականացման են ներկայացվել ՀՀ գյուղատնտեսության նախարարության սննդամթերքի անվտանգության պետական ծառայության «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» պետական ոչ առևտրային կազմակերպություն, որի չորս մասնագետների կողմից տրվել են փորձարկման ակնհայտ կեղծ արձանագրություններ՝ սերուցքային կարագ հանդիսանալու վերաբերյալ, ինչը հնարավոր է դարձրել խաբեությամբ կարագի փոխարեն նշված ապրանքատեսակների մատակարարումը ՀՀ պաշտպանության նախարարությանը»:
Այս ամենի հետևանքով, ըստ ԱԱԾ-ից ստացված պատասխանի, պետությանը պատճառվել է 162 մլն 914 հազար 567 ՀՀ դրամ գումարի վնաս:
ԱԱԾ-ից տեղեկացրել են նաև, որ քրեական գործով մեղադրանքներ են առաջադրվել՝ արտադրությունը և մատակարարումները կազմակերպած անձին, ընկերությունների երկու տնօրեններին, ՀՀ ԳՆ ՍԱՊԾ ՀԱԲԼԾԿ ՊՈԱԿ-ի չորս մասնագետներին:
Նշված 7 մեղադրյալներից 3-ի նկատմամբ խափանման միջոց է ընտրվել կալանավորումը, իսկ 4-ի նկատմամբ՝ ստորագրություն չհեռանալու մասին: Ստացված պաշտոնական պատասխանում անուններ նշված չեն:
Օրեր առաջ ՍԱՊԾ պետ Իշխան Կարապետյանը լրագրողների հետ հանդիպմանը անդրադարձել էր այս դեպքին, ասել, որ այն իր ղեկավարած հիմնարկի որևէ պաշտոնյայի հետ կապ չունի և իր պաշտոնավարման տարիներին նման դեպք տեղի չի ունեցել:
Նշենք, որ ԱԱԾ պաշտոնական տեղեկության համաձայն, բանակին մատակարարումներն իրականացվել են 2016-2017 թվականներին: Իսկ Իշխան Կարապետյանը այդ պաշտոնին նշանակվել է 2016 թվականի նոյեմբերին:
