ԵՐԵՎԱՆ, 27 դեկտեմբերի — Sputnik. Մոսկվան ու Անկարան ավարտել են բանակցությունները «Տրիումֆ» С-400 զենիթահրթիռային համալիրների չորս դիվիզիոնների առաքման մասին, չորեքշաբթի «Կոմերսանտ» թերթին տված հարցազրույցում ասել է «Ռոստեխ» պետական կորպորացիայի ղեկավար Սերգեյ Չեմեզովը։
Նրա խոսքով` մնացել է ստորագրել եզրափակիչ փաստաթղթերը։ Գործարքի ընդհանուր գումարը կազմել է 2.5 միլիարդ դոլար, որից 45 տոկոսը թուրքական կողմի վճարն է, 55 տոկոսը ռուսական վարկն է Թուրքիային։
«Տրիումֆ» С-400-ի առաջին առաքումները Թուրքիան նախատեսում է սկսել 2020թ-ին։
Չեմեզովը հատուկ նշել է, որ գործարքի արդյունքում Թուրքիան կդառնա «ՆԱՏՕ-ի առաջին երկիրը», որը ձեռք կբերի С-400 հակաօդային պաշտպանության համակարգի նորագույն համակարգը։
Թուրքիայի նախագահ Ռեջեփ Թայիփ Էրդողանը դեռ սեպտեմբերի 12-ին ասել էր, որ Անկարան Մոսկվայի հետ համապատասխան համաձայնագիր է ստորագրել և կանխավճար կատարել։ Թուրքիայի պաշտպանական արդյունաբերության քարտուղարության պետի տեղակալ Իսմայիլ Դեմիրը հայտարարել է, որ С-400 համակարգերի առաքումները կմեկնարկեն երկու տարվա ընթացքում։
С-400 «Տրիումֆը» մեծ հեռահարության նորագույն հակաօդային պաշտպանության զենիթահրթիռային համակարգ է։ Նախատեսված է ավիացիայի, թևավոր և բալիստիկ, այդ թվում՝ միջին գործողության շառավղով հրթիռների ոչնչացման համար, ինչպես նաև կիրառվում է ցամաքային օբյեկտների դեմ։ С-400-ի հեռավորությունը 400 կիլոմետրի է հասնում, այն կարող է ոչնչացնել մինչև 30 կիլոմետր բարձրության վրա գտնվող թիրախներ: С-400 «Տրիումֆը» համալրել է ռուսական բանակի սպառազինությունը 2007 թվականին։
