ԵՐԵՎԱՆ, 27 դեկտեմբերի — Sputnik. Սերժ Սարգսյանից լավ ոչ ոք չի կարող պայքարել Հայաստանի ներքին և արտաքին մարտահրավերների դեմ, չորեքշաբթի լրագրողներին ասաց Հայաստանի Ազգային ժողովի փոխխոսնակ, Հայաստանի հանրապետական կուսակցության փոխնախագահ Էդուարդ Շարմազանովը։
Խորհրդարանականը պատասխանեց հարցին, թե ինչու ՀՀԿ առաջնորդ, Հայաստանի գործող նախագահ Սերժ Սարգսյանը չի հայտարարում 2018թ-ին վարչապետ դառնալու մտադրության մասին։
«2018 թվականը կգա, բարին էլ հետը։ Կքննարկենք, կպատասխանենք», — ասաց Շարմազանովը։
Նրա խոսքով` հանրապետականները ՀՅԴ-ի հետ կշարունակեն ղեկավարել մինչև 2022թ-ը։
«Հայաստանի գործող քաղաքական գործիչներից չգիտեմ որևէ մեկին, որը կարող է հակազդել ներքին և արտաքին մարտահրավերներին, ընդունել ավելի ճիշտ և արդյունավետ որոշումներ, քան Հայաստանի նախագահը` ՀՀԿ նախագահ Սերժ Սարգսյանը», — ասաց Շարմազանովը։
Նրա խոսքով` ցանկացած ոլորտում կան անփոխարինելի մարդիկ, այդ թվում` քաղաքականության մեջ։ Ավելին` ՀՀԿ յուրաքանչյուր անդամի համար պատիվ է ներկայացնել այն կուսակցությունը, որի «հրամանատարը» Սարգսյանն է։
Շարմազանովը խոստովանեց, որ կրկնակի հպարտ է, որ ավանդ ունի այն պետության զարգացման գործում, որը ղեկավարում է Սարգսյանը։
«ՀՀԿ-ում կա թիվ մեկ առաջնորդ թե՛ Կարեն Կարապետյանի, թե՛ ինձ, թե՛ Վիգեն Սարգսյանի, թե՛ Տարոն Մարգարյանի` բոլորիս համար։ Սերժ Սարգսյանն է», — ասաց Շարմազանովը։
Հիշեցնենք, որ 2015 թվականի դեկտեմբերին հանրաքվե անցկացվեց, և հաստատվեցին ՀՀ սահմանադրական փոփոխությունները, որոնց համաձայն` նախատեսվում է անցում կատարել կառավարման խորհրդարանական համակարգի երկրի ներկայիս ղեկավարի իրավասությունների ժամկետի ավարտից՝ 2018 թվականից հետո:
Բարեփոխումների վերաբերյալ քննադատորեն արտահայտվեց ընդդիմությունը` դրանք անվանելով կեղծ ու Սերժ Սարգսյանի իշխանության պահպանմանը միտված։ Սրան ի պատասխան ՀՀԿ-ն և կառավարության ներկայացուցիչները հայտարարեցին, որ Սերժ Սարգսյանը մտադիր չէ վարչապետի պաշտոն զբաղեցնել։ Թե ով կլինի վարչապետը 2018 թվականի ապրիլից հետո, ՀՀԿ-ն դեռ չի հայտնում։
