ԵՐԵՎԱՆ, 27 դեկտեմբերի — Sputnik. Բանանի 1 կգ մանրածախ գինը երևանյան մի շարք խանութներում 890-ից հասել է 1200 դրամի, գրում է «Առավոտը»` նշելով, որ այն մի քանի օրվա ընթացքում թանկացել է 200-350 դրամով։
«Անկախ այն բանից, որ բանանի շուկայում ներկրողները շատանում են, ՊԵԿ-ն էլ վստահեցնում է, որ բանանի մենաշնորհը «կոտրվել» է, այդուհանդերձ, ամենաթեթև առիթի դեպքում բանանը միանգամից թանկանում է»,- գրում է թերթը։
ՊԵԿ-ի տվյալներով այսօր մեր երկրում բանանի 50 ներկրող կազմակերպություն ու անհատ կա։ Բայց նույնիսկ նման մրցակցության դեպքում բանանի գինը չի նվազում։
«Առավոտը» նշում է, որ մասնագետները չեն բացառում, որ բանանի խոշոր ներկրողները մեր երկրում շարունակում են մնալ նույնը, բայց մի քանի տարբեր անուններով։
Թերթը նաև հիշեցնում է, որ կառավարության վերջին նիստում վարչապետ Կարապետյանը ՏՄՊՊՀ-ին հանձնարարել էր Ամանորին ընդառաջ վերահսկողություն սահմանել գերիշխող ապրանքային շուկաներում` անհիմն թանկացումները բացառելու համար։
